港股上午一度跌破11400水平，市場憧憬美股反彈，港股亦重上11500水平收市，報11508，升22點，成交則減至135.3億元。
外資走下多啲又多啲，留在銀行體系內的資金跌破500億元，噚日單日唔見咗40-50億元，如果呢個趨勢持續，銀行體系內嘅資金好快就要清袋，一旦銀行資金被抽緊，最優惠利率想唔跟足美國加息幅度都唔得。
銀行體系先前錄得逾500億元進帳，主要是因為有對沖基金流入炒賣國企及認購國企新股，現在資金開始流走，相信國企股有排冇運行。人保財險（2328）噚日反彈5.7%至2.80元；中國人壽（2628）反彈4.4%至4.175元，但唔知佢哋重可以反彈得幾耐？
中銀香港（2388）噚日成交4.46億元，但有1.49億元屬於沽空交易，黑客話可能有消息跟尾，唔通有人為中行再減持中銀香港進行部署？
哈爾濱市政府開聲支持安海斯入股哈爾濱啤酒（249），睇嚟SABMiller就算勉強取得哈啤控股權，日後在缺乏政府及管理層支持下，哈啤唔易有發展。喺咁嘅情況下，安海斯未必要出高價與SABMiller爭奪哈啤，對小股東嚟講當然冇好處，但哈啤股價噚日仍跟隨國企股反彈，升6.3%，收4.675元。
另外，有美資行突然出報告，話哈啤收購價最終可能達8元，而呢個收購價是基於目標價6元再加35%溢價。
但阿虎仍然唔明8元呢個價錢點樣計出嚟，照計兩大啤酒集團出價，應該唔會以證券行所估計的目標價作為基礎。
阿虎