財赤當道，冇乜邊個部門唔為開源節流而頭痕，今年預計有六億赤字嘅醫院管理局，本來諗住喺醫院裏面闢出一啲位置嚟賣廣告招財，但實行起上嚟，先發覺要搵個適合嘅時機都唔係一件易事。醫管局行政總裁何兆煒噚日同八方講，佢哋上年已經想喺醫院裏面賣廣告嚟增加收入，點知咁唔好彩撞正沙士，市民唔可以入醫院探病，呢個大計只好擺入雪櫃存封先啦。
話咁快沙士過咗一年，好彩冇再返嚟香港，醫管局以為今年都應該可以賣到廣告啦！點知人算不如天算，踏入今年，各間醫院都好似成日掛起啲乜色物色警示。何兆煒笑住話，咁多警示掛出嚟，賣廣告一事自然就唔使諗啦。不過，就算真係可以喺醫院賣廣告，醫管局都要嚴選啱心水嘅產品，好似話藥物、偉哥、醫療設備呢類貨品就一於免問，至於乜嘢先至係適合？何兆煒諗咗一諗，話旅遊廣告都可以考慮，唔知佢係咪喺舊年中咗沙士留醫期間，一個人喺病房度好想去旅行，所以有呢個諗法呢？
傳真︰2623-9278
電郵︰