提起大尾篤，不外乎諗起踩單車、BBQ、放風箏同釣魚，其實大尾篤背靠八仙嶺，登山遠足一樣咁方便，由八仙嶺自然教育徑嘅春風亭起步，轉入橫七古道，探兩古村、兩古橋，參觀香港罕見嘅連體六角亭「尤德亭」之餘，兼可高處眺望鹿頸同南涌。
記者、攝影：陳震霖
模特兒：偉（StarAsia）
事先聲明，由大尾篤行到鹿頸，全程差唔多7小時，出發前唔該喺碼頭附近BBQ場補充定糧水，之後行入荒山野嶺，想搵補給站都幾難。買完糧水，正式出發，由碼頭出番汀角路，向新娘潭路方向行，有路口接山路上山，5分鐘路程應該去到船灣郊野公園遊客中心。
遊客中心規模唔算大，但資料豐富，除有展覽板及實物模型介紹郊野公園外，遠至香港極東東平洲嘅動植物生態，都有詳盡介紹。歎夠冷氣，出番遊客中心，八仙嶺自然教育徑已近在咫尺。
八仙嶺自然教育徑初段係整齊石路，雖暗斜但唔算難行，上山10分鐘會見到個涼亭，大家千祈唔好掂行掂過，因為「春風亭」係非一般涼亭。
為紀念1996年2月10日香港中國婦女會馮堯敬紀念中學師生遇難事件，同年3月由當時總督彭定康主持「春風亭」落成儀式，當日師生50餘人到八仙嶺遠足，遇山火有4人遇難、11人受傷，其中2位老師為搶救學生更不惜犧牲寶貴性命。
繼續上山至400米高，可以遠眺船灣淡水湖，最搶眼當然係主壩，全長2,000米，成把間尺咁將淡水湖同船灣海分開，每逢假日，例牌有市民喺主壩直路上踩單車狂奔，眼力好啲，重見到船灣海帆船飄揚。
睇夠靚景，轉入橫山腳，向橫七古道進發。橫山腳有兩條廢村，分別係橫山腳上、下村，古村荒廢多年，四圍石牆已經破爛，某啲村屋雖然重隱約見到門口，但入屋只見雜草叢生，舉步維艱。橫山腳上、下村均屬於新界認可原有鄉村，即1898年或前已經喺新界存在嘅鄉村，只要父系源自呢啲鄉村，男村民就可以喺村內範圍免地價興建新界豁免小型屋宇，即丁屋。
橫山乜都一對對，橫山腳上、下村係一對，橫山上、下七木橋又係一對，先經過上七木橋，如果無石碑指示，重以為係普通橋一條。企喺橋面，低頭見淙淙流水，昂首見雀仔飛過，彷彿世外桃源，再過有竹林隧道送行，穿過隧道，陽光微微射進眼簾，清風擦過皮膚，感覺超爽。
接走下七木橋，今次一樣，多得第二塊石碑指路，否則實以為自己撞鬼，兜嚟兜去又行番同一條橋，因為上下兩橋基本上一模一樣。綜觀八仙嶺自然教育徑同橫七古道，途中最少見七八條大小石澗，主要原因係橫涌石澗源自八仙嶺橫山頭，下注涌尾，貫連橫山兩古村同兩木橋，所以行極都唔覺好熱，因為有竹林遮蔭，兼有冰凍山水洗面醒神。
行程去到尾聲，落鹿頸前，不妨先參觀尤德亭。亭一個，有乜咁巴閉？此亭為紀念前港督尤德爵士而建，最特別地方係由兩個連體六角亭組成，一共十柱八角，喺香港芸芸涼亭中，的確少見。小休嗰陣，記得欣賞亭下美景，南涌同鹿頸兩地嘅魚塘村屋，剛巧俾中間一個小山隔住，畫面極美，如果撞啱黃昏日落，魚塘泛起金光水影，個畫面重靚。
行足7小時，唔肚餓就假嘅，落到鹿頸，小巴站隔籬有茶座，唔想腳仔軟出市區，不妨整番個馳名牛腩飯醫醫肚（$28），加多杯凍檸樂（$13），食飽飽先打道回府。
開心茶座（26559889）
地址：大埔新娘潭路鹿頸村2號
