《蘋果日報》甚少刊登地產廣告，不是秘密，因為一啲大集團都有咁啱得咁蹺，話《蘋果》冇廣告效力，所以唔落廣告喺《蘋果》喎。
今期嘅Media（五月七號）（一份專畀廣告界、公關界、企業傳訊界從業員睇嘅刊物，號稱係TheMarketingandCommunicationsNewspaperforAsia，你冇睇過，即是唔係廣告界人物）第六版，有一篇關於《蘋果日報》廣告嘅文章，作者AounSudhasman，內容引述一位業內人士嘅談話：「大地產商與內地有密切關係，大家冇證據話佢哋收到指示，但呢兩個月嘅廣告數字可知端倪。」從研究公司admanGo嘅數字得知，由今年一月到三月，全港地產廣告消費高達港幣四千四百九十萬元（打個六折之後），其中《蘋果日報》只係分到九十四萬八千元（即係兩個巴仙咁大把），以《蘋果日報》喺銷量及讀者人數計，只爭到2%地產廣告，簡直不成比例。
Media引述一位行內人士話：「呢個係雙輸（lose-lose）局面，《蘋果》固然輸，但廣告客戶亦輸，因為喺一份擁有正確對象嘅刊物賣廣告，可以慳番廣告支出。」Media又訪問咗新世界集團嘅企業傳訊總監關則輝，關則輝強烈否認新世界集團杯葛《蘋果》。關則輝話：「呢個係商業決定，我哋冇因為報紙立場而決定落唔落廣告。我哋唔係份份都落廣告嘅，包括親中刊物在內。」關則輝嘅商業決定唔知甚麼準則釐定，讀者人數呀？銷量呀？讀者背景（profile）呀？廣告費貴定平呀？浪費（wastage）少呀？廣告效力呀？關則輝係一個叻人，如果佢肯講詳細啲，可以等啲廣告人學吓嘢！