話說日本食店少東介紹飲日本燒酒，「我喺福岡見到啲日本燒酒吧，百幾款唔同嘅日本燒酒一支支擺喺酒櫃，真係睇到都已經有啲醉。」「唔好齋講啦，不如介紹幾款試吓？」忍不住好奇心，講多無謂，不如飲實際。
少東隆而重之地捧來幾瓶日本燒酒，每個酒瓶的包裝各有性格，日本真不愧為包裝強國。「其實燒酒係咪即係斬大嚿叉燒嘅玉冰燒？」我問。少東望住個酒瓶，充滿感情地說：「你當係威士忌咁飲就啱㗎嘞，因為都係蒸溜製嘅。」
首先試的是用米及麥製的，口感果然一如威士忌，但較溫和。「跟住試吓飲呢款用番薯製嘅，唔鍾意嘅會覺得有股臭味。」聞確是麻麻哋，但卻是很好喝，尤其是喝後的那股甜香，久久不散。「嗱，呢款就係加咗紫蘇葉嘅，用嚟𠱁女仔飲一流，不過飲少少好嘞，唔係因為貴，係好難買，日本全部都賣到斷晒市。」果然又是另一種風味。
少東見酒逢知己：「冇辦法，攞埋幾支珍藏出嚟試吓。」丫頭們聽到立時歡天喜地去攞酒，睇得出少東平時都唔捨得攞出嚟大家飲，所以有機會飲好開心。第一瓶叫「天狗櫻」、第二瓶叫「RAN」（音躝）、第三瓶叫「魔王」，名字雖然一瓶比一瓶惡，但酒質卻是一瓶比一瓶醇。最後少東拿出一個空酒瓶，酒名叫「百年之孤獨」，「呢支我飲晒都買唔番，下次入到貨再飲過！」
吃了一頓像是武俠小說中以酒會友的好飯，心情好得不得了，應該是走運了，不走運的話，怎會碰到這種好地方、好酒友?!