喺萬般無奈痛苦之中，當奴喺立法會公布政制檢討第三號報告，又係將個波彈番畀公眾，叫港人提意見。
人民政府一早量度好尺寸，話明功能組別及直選五十對五十，直選議席一個都冇得加。比起以往幾屆，功能組別由十八席加到二十，二十加到廿四，又由廿四加到三十，二○○八年又係維持一半，即是根本冇「循序漸進」。
有人建議，不如成立一個「上議院」，一劏為二，將功能組別全部搬上樓，所有草案由「下議院」通過之後，再提交「上議院」，不過「上議院」就有否決權。
呢條橋，照抄英國制度，不過又通唔通呢？人哋英國上議院好多議員係世襲制，係皇家貴族，由於發財立品，兼而對榮華富貴睇到化，反而更加同情草根窮人，英國社會反而會穩定，你香港特區嗰個「上議院」，除咗得李Baby一個係李氏家族嘅殖民地高等華人BlueBlood，其他好多都係親中暴發戶，又有幾席係民主黨，幾樣溝埋，唔湯唔水。由直選嘅「下議院」通過嘅好多法案，提交到特區「上議院」，俾佢否決，咁就好易有暴動！
特區唔係英國，正如溫寶寶話頭，教育素質未夠，立亂抄襲英國佬嗰套，一定死路一條！人哋上議院議員個個係貴族，包括一早換血嘅鄧蓮如女男爵，個個知書識禮，心懷慈悲，而且唔係英女皇奴才，特區又學人搞個「上議院」，不過好多都係政治Cheap精，冇厘貴格，乜都睇晒北京眉頭眼額，成立上下院制，唔使諗，一定此路不通！
睇吓主席范太嘅處境就知。雖然扑低咗何俊仁嘅譴責人大常委會提案，何俊仁改為「不滿」，范太認為冇問題，但親中左佬重係不滿，係都要監范太扑多幾棍，扑濕何俊仁為止，公然粗暴干預立法會主席嘅神聖權力，搞乜叉上議院？搞個木偶公仔戲嘅戲台就差唔多！
唔怪得當奴冇晒癮，立法會發言，講到明自己係身不由己，叫港人唔好再有不現實嘅諗法。「諮詢」會有排搞，三上三落，修改七八鑊，藍紙定白紙草案，又嘈一輪。民主派𠵱家嗌乜都冇用，搞好個九月立法會選舉嘅「饑饉三十」，死都鍊夠三十席，先至有得翻生。九月點樣投票？全港市民，睇自己頭嘞！
傳真︰2623-9278
電郵︰