雖然靚人夫婦畢彼特（BradPitt）同珍妮花雅麗絲頓（JenniferAniston），結婚咁多年就傳足咁多年婚變，但就以最近畢仔被傳搭上安琪蓮娜祖莉（AngelinaJolie）呢單最大鑊。
雖然畢仔近排已經否認過無數次有關婚變嘅傳聞，前日佢出席電影《木馬屠城》嘅紐約首映時，重拖埋畢嫂出嚟闢謠，完全搶晒澳洲型男艾力班納（EricBana）同女星露絲拜恩（RoseByrne）嘅鏡，但前兩日狗仔隊啱啱先影到畢嫂痛哭嘅樣，實在難以令人相信佢哋乜事都冇。
事緣有雜誌之前刊登咗啲畢仔同安琪蓮娜喺拍電影《Mr.andMrs.Smith》時，收工手拖手同埋匿喺安琪蓮娜架保母車上嘅相，聽講珍妮花睇咗之後即刻失控痛哭，重搵《老友記》嘅老朋友麥尼賓（MattLeBlanc）訴苦，麥尼賓重緊抱畢嫂加以安慰。
本雜誌重話，畢仔其實重嫌棄老婆日日食煙生唔到仔，令畢嫂更加心碎，𠵱家佢兩公婆已經分房瞓。難怪我羅拉見畢仔夫婦出席首映時合照，總覺得有啲貌合神離！