港股噚日朝早又跌百多點，恒指最低見11331，剛好掂到下降通道底部先反彈，午後升勢有力，唔單止收復失地，恒指收市重有22點進帳，期指則明顯轉強，大幅反彈上11474收，升175點，低水收窄到只有34點，計埋藍籌股除息嘅因素，期指已略為高水，市場氣氛似已有所改善。
國企股仍係市場焦點所在，原料股全面反彈，中國鋁業（2600）升5.33%、江西銅（358）升5%；3隻鋼鐵股中以馬鋼（323）最有力，升6.25%、鞍鋼（347）進帳5.1%，而跌幅較大但反彈力度重係好弱的重慶鋼鐵（1053），則只升得3.96%；水泥股安徽海螺（914）一度重上9字頭，回收8.9元，升4.7%。
國企今次股災，原料股中的金屬股同石化股都好傷，但跌幅最大係第一拖拉機（038），由高位3元跌到最低位的1.19元，跌幅高達60.3%，但同宏調無關，主要係業績差。
今日講金屬同水泥股，先睇吓佢哋跌得幾「金」：
‧重鋼高價5.55元，低價2.475元，跌幅55.4%。
‧江西銅高價5.4元，低價2.45元，跌幅54.6%。
‧鞍鋼高價5.1元，低價2.4元，跌幅52.9%。
‧馬鋼高價3.95元，低價1.98元，跌幅49.8%。
‧中鋁高價7.1元，低價3.675元，跌幅48.2%。
‧安徽海螺高價14.2元，低價7.8元，跌幅45%。
股價大跌，主要係同中央宏觀調控有關，企業本身今年嘅盈利仍會有增長，個別甚至仍可倍升，現時風頭火勢，股價跌到過晒龍，但若以中線為出發點，現價已可分段收集，贏面好大。
宏調發揮效力，內地鋼材價格已從3月高位回落，幅度約15%至20%，但相比去年仍處於高水平。跌幅最大的重鋼，今年預測盈利調低至每股0.9元，PE仍不足3倍。海螺04年預測盈利每股1.0元，以PE12倍計，股價可重上12元。至於中鋁，04年預測每股盈利調低至0.58元，PE只係6.8倍，相比海外同業的20倍，大大偏低。
郭兆誠