樓市轉靜，市場會關注啲乜？中原地產似乎好留意屋苑嘅成交狀況，佢哋周一至話，火炭駿景園今個月頭九日冇成交，噚日又話，觀塘麗港城十一日「食蛋」。睇嚟，樓市真係交投好疏落喎，咁有乜啟示呢？
中原分行經理謝德生話，麗港城上月頭十一日，共有十二宗買賣，今個月就一單都冇，主要係受美國可能提早加息，以及內地宏觀調控影響。
至於隔籬滙景花園，都唔好得幾多，今個月頭十一日，都係得兩宗成交，比上月同期減少六成。
不過，麗港城部份業主態度好兩極化，約一成半即時軟化，肯主動減價三至五個巴仙。
但另有約一成認為，有月底賣地及發展商開價仍然強硬等利好消息支持，所以要到價至賣，甚至反價兩至三個巴仙㖭。
美聯主席黃建業，早排入咗唔少豪宅，好似跑馬地禮頓山、淺水灣嘅華景園及南山別墅，𠵱家放緊。不過，豪宅市道放緩，代理要游說業主減價賣樓，對黃老闆都照「鋤價」，想佢收順啲，幅度五至十個巴仙。
之前豪宅價錢升得咁急，市況回落，要調整吓都理所當然。
蘭西覺得，要黃老闆減五至十個巴仙，都唔算離譜。
佢重好有信心話，賣咗手頭上嘅單位，套現後，重會再入貨，𠵱家重係適當時機。
中原加州錦綉分區經理龍智烽話，股市波動，兩個投資者即刻大幅降價，沽售元朗加州花園單位離場。其中偉仕居單號屋，二○一四呎，以六百萬沽出，較叫價低7.4%。名仕居單號屋，一四六三呎，則減價三十萬至四百三萬，減幅達6.5%。
龍智烽話，兩人削價出貨，影響所及，屋苑放盤增加，𠵱家有二十幾個，議價幅度擴大，由以前只係得三個巴仙，擴大至一成至一成二。
薄扶林浪頤居招標記者會，發生困𨋢意外，過程有驚無險。
由第一太平負責代理帶同記者一行十三人，乘搭載重量十五人嘅𨋢，往示範單位，部𨋢上上吓，突然急跌，然後停咗。代理即時喚人求救。
為紓緩緊張氣氛，代理竟然叫記者繼續做訪問。不過，唔使五分鐘，保安都未到，一名記者徒手打開𨋢門，輕易救出各人。
香港地產代理專業協會啱啱選出王羅桂華做會長，而前任會長鄧意民就出任副會長。
王羅桂華辭任香港興業旗下華聯興業董事長後，曾加入恒基中國，之後加盟駿豪集團，做緊觀瀾湖高爾夫球會住宅項目。
呢個項目啱啱開賣第一期，呎價二千蚊人民幣，售價由一千萬起，買家認真夠貴氣。
另外，地產代理聯會選出郭德亮為新一屆主席。上屆主席李文邦則出任榮譽會長。
蘭西
電郵地址：
