李家祥呼籲走出衣櫃 - 李八方

  李家祥呼籲走出衣櫃 - 李八方

立法會會計界代表李家祥事先張揚唔選下屆立法會,噚日佢同傳媒茶敍,細說從頭,講到從政十幾年,參與過大大小小四十幾個政府諮詢委員會及百幾間非政府機構,當中唔少係做主席、副主席及會長。雖然身為會計師應該唔怕悶,但李家祥諗起都話,大部份嘅會都悶死人。
其中一份公職就一啲都唔悶,李家祥原來係TVB兒童節目諮詢委員會委員,佢話好多兒童節目,都由佢畀過意見,其中一個就係《兒歌金曲》,佢當年曾於委員會上話,見到七八歲嘅細路唱埋啲情情塔塔嘅歌,周身唔自然,建議兒歌要清新健康啲。講到第三屆特首嘅形勢,佢認為現時係奴才鬥太監,太多篤背脊,背後插到血肉淋漓,不如有興趣嘅候選人大大方方,好似gay佬咁,走出衣櫃,光明承認,由阿爸阿媽代答嘅都唔算數,至少日後互片可以明刀明槍。


傳真︰2623-9278
電郵︰[email protected]