特區政府諗緊好唔好立例批准番長洲搶包山，再造旅遊「景點」，吸引番啲遊客。
搶包山係長洲太平清醮習俗，可惜喺廿年前，因為個包山搶搶吓倒冧，搞到多人死傷，殖民地政府乘機禁止。不過今時今日再恢復搶包山，又有冇吸引力呢？
首先現時嘅自由行遊客，來自大陸，佢哋每日搭巴士、迫火車，或者見到眼前有錢執，一早就長期搶慣咗包山。喺上高，每做一件事，若然練唔出一身搶包山嘅本事，狂捐亂推，鬆肘踩膊，㩒實人哋個頭嚟瘋狂上位，可謂一早就俾個國家淘汰。長洲恢復搶包山可以吸引大陸遊客嚟睇？不如掉番轉，叫啲自由行大陸遊客親自示範教番啲長洲人點樣搶包山好過。
又或者，將搶包山節目進行改革，毋須長洲島民自己嚟搶，而係索性轉嫁畀自由行大陸旅行團直接嚟表演。只要搭個棚，將以往成千上萬嘅壽包，改為成千上萬細罐庄嘅美英入口奶粉，照樣好似包山咁搭高，每日由自由行旅行團各團友嚟搶，包保佢哋表現更加專業夾落力，搶到幾多，免費帶番幾多上安徽同湖南，當係香港同胞一片奶濃於粉嘅心意。橫掂今時今日，我哋長洲出過一個奧運金牌風帆皇后，長洲舉世聞名，長洲島民亦個個身嬌肉貴，發財立晒品，經已唔適合再玩呢亭咁高風險嘅農村活動。
若然祖國自由行掃貨團，日日喺尖沙嘴銅鑼灣金舖同Sogo搶包山碌卡掃貨，搶到冇晒力，長洲搶包山對佢哋全無吸引力，咁就無謂破例恢復搶包山合法化，因為呢樣嘢有少少意識不良，畀香港嘅青少年下一代見到，以為啲包個個免費，搵食原來可以靠搶，咁青少年嘅思想就會遭受污染。
更何況，呢十幾年來，工商界同社會精英，香港人睇呢一小撮人「搶包山」，亦睇到慣。搶嘅係港區人大、政協、大紫荊、銀銅紫荊，同埋上到北京拜見領導人，影相合照、國宴埋位嘅「政治包山」。呢一座包山，年年月月都有得搶，點樣卡位食力、擒七打八咁踩住人哋膊頭上，終於成功搶到上行政會議、人民大會堂或中南海嘅包山制高點，心口攬實一堆包，兩個袋又塞滿七八個，個口又𡁻緊一兩隻，一路搶，一路拋落嚟畀啲阿媽、叔仔喺下面接住，人頭湧湧，場面鬼咁壯觀，充滿物競天擇嘅殘酷感。
所以使乜咁多叉餘，恢復乜嘢搶包山？第三屆特首嘅包山，𠵱家都有幾個食力上到去一半位喇．好聲呀咁多位，顧住個包山唔食力，成座冧落嚟咁就樂極生悲咯。
傳真︰2623-9278
電郵︰