哀鴻遍野，恒指暴瀉425點。第50大跌幅嘅股份，跌幅都超過11%。跌10%都唔能夠上50榜，認真少有。威水榜上，自然係Put輪天下，升得最勁嘅50件，最大升幅係118%（恒指Put輪9320），最小升幅都有24%。死火榜上，跌得慘烈嘅50件，最大跌幅77%（聯通Call輪9186），最小跌幅都有42%，可知如何慘情。
即月期指跌到11299，多隻大藍籌陸續除息，期指低低哋水好應該，但5月期指低水低到186點，則意味短期個勢都係唔多得。
1年零15日前，沙士搞到人心惶惶，恒指最低8331，跟住到今年3月頭，恒指見14058，10個月升幅5727點（升幅69%）。3月頭到𠵱家，跌2573點（跌幅18%），用恒指計嘅跌幅係升幅嘅45%。跌1半計，低位喺11195。
𠵱家喺窩輪市場活動，猶如喺大海中釣魚，可能釣到大魚，亦可能自己反肚。買Put輪嘅理由係，個市不利消息充斥、淡友可能加多一腳，恒指再散多幾百點，不過跌到𠵱家，人人睇淡，就隨時出現技術性反彈，甚至見底。好多二三線股，PE落到3-4倍，重想點？記唔記得去年4月最尾幾日，梁智鴻預測月底本港有機會有幾多宗沙士，全城口罩賣到斷市，原來呢個時候就係見底之時。今日賭窩輪，賭Put與Call都有機會大輸與大贏，注碼至緊要細。目前窩輪市場凶險非常，免得過嘅話，暫時休息。
章盛