大市噚日急挫逾4百點，小初真係傷心到不得了，睇住一隻二隻愛股跌回半年前嘅水平，有乜辦法唔心痛。經紀陳話，其實有啲細價股唔係炒家冇錢頂，而係根本費事頂。睇嚟呢排真係唔好手多多。
上周曾經提過澳門實德（487）可能批股唔成，結果真係搞唔成。隻股噚日復牌，大跌9.1%，收0.60元，但成交唔大，只得126萬股，金額76萬元。
經紀陳始終堅持實德批唔成股係技術性問題，唔係冇人要。佢重話實德貨源分布，有關人等知得好清楚，但既然批股計劃唔成事，實在冇乜理由逆市力頂，單睇隻股噚日成交咁細，就知道實際沽壓唔大。
家陣如果重有股票錄得升幅，其實大都係乾升。不過，即將改名做先科國際嘅千禧智慧（724），唔明點解有人頂得咁勁，噚日逆市上升3.45%，收1.20元，成交金額有253萬元。經紀陳話，據講有人想落力推介該股。但小初懷疑現時咁嘅市況，究竟有冇人會跟？
慕容小初