夫妻分頭接廣告邊個有So?<br>木村谷起靜香 反町唔爭氣

夫妻分頭接廣告邊個有So?
木村谷起靜香 反町唔爭氣

明星嘅主要收入來源都係廣告,如果藝人夫婦拍住上做產品代言人,叫價肯定double,弊在日本藝人有個傳統,夫妻好避忌同場出現,所以都會分開搵食。咁大家又知唔知邊對銀壇夫妻嘅廣告收入係互利互惠,又有邊對會累鬥累?
講到帶挈另一半,大家一定諗起木村拓哉。事實上佢同工藤靜香成親後,依然keep得住一份廣告收六百零三萬港紙,呢個價錢喺日本藝人嚟講已經係頂級。而喺婚前人氣跌至谷底嘅靜香,做咗木村嘅女人後反而多咗平價化妝品同家庭用品搵佢,雖然靜香一份廣告只係維持喺二百八十萬港紙收入,但勝在密食當三番。

兩公婆拍住上
如果掉轉頭講老婆帶挈老公嘅話,實在唔可以唔提菜菜子。菜菜子一份廣告仍可以叫價五百萬,叫佢做廣告女王實在當之無愧,相反人氣低沉嘅老公仔反町隆史,黐住老婆都重可以叫價二百八十萬港紙,但就有價冇市囉。
講到相輔相成嘅,就肯定係唐澤壽明同老婆山口智子,老公喺幕前愈嚟愈紅,老婆婚後閒來拍吓廣告賺錢買花戴,佢哋各拍一個廣告夾埋已經賺八百四十萬港紙,聽聞重會加價㖭。