西甲勁旅皇家馬德里隊長魯爾，唔止腳法了得，原來重同隊友碧咸一樣咁有設計天份，碧咸早前為馬莎百貨設計一系列DB07童裝，魯爾亦因為同愛妻MamemSanz食飯時忽然靈感到，共同設計出「七號蜻蜓」T-shirt。
魯爾嫂前日抵港，噚日到新世界中心名店SwankShop宣傳，傳媒好關心佢同魯爾婚姻亮紅燈、同埋與碧咸嫂維多莉亞不和嘅傳聞，魯爾嫂咁答：「我不想評論其他人，我不可以講，我與維多莉亞沒有不和，見面更會sayhi；我與丈夫感情亦無問題，雖然我們已有兩個孩子，但還想再添寶寶。」
魯爾嫂話四歲嘅大仔親手畫咗條圍裙畀佢作母親節禮物，𠱁得佢好開心，老公就送鑽石手鏈（戴住喺手）。對於香港佢亦大讚「impressed」，「我去咗赤柱shopping，買咗天線得得B同蜘蛛俠睡衣畀個仔，重坐遊艇欣賞維港夜景㖭。」
傳真︰2623-9278
電郵︰