陸叔陳永陸主持嘅電台節目《人生交叉盤》，唔經唔覺已經五周年，噚日商台特登同佢搞慶祝酒會，請晒陸叔訪問過嘅財經名人出席，陸叔嘅港大同學、現時貴為財經事務及庫務局局長嘅馬時亨都有捧場，重上台一齊祝酒。噚日咁啱遇上股市大跌，聽講話肥仔馬做過分析員，於是有記者追問馬局長點睇，點知肥仔馬話：「問我股票，我唔識comment喎」，乜咁謙呀。
陸叔話，佢呢個節目唔係教人買邊隻股票，而係好似喺懸崖邊睇浪，話畀人聽啲潮水幾時嚟，等投資者知所進退，其實即係教人分析財經資訊，然後作出投資決定。
近日證監話要監管分析員，佢就好贊成咁話講股佬都應該攞牌，因為佢哋影響力大。八方望吓個場，又幾多股壇明星去捧場噃，例如鄧聲興，不過就唔見以前同陸叔拍檔嘅曾志英。
（圖）陸叔（右二）同馬時亨（左二）、主持陳慧儀（右）及商台總經理陳靜嫻（左）一齊祝酒。
傳真︰2623-9278
電郵︰