新車速報：SuzukiGrandVitaraXL-7<br>新版7人大包裝維他奶

新車速報：SuzukiGrandVitaraXL-7
新版7人大包裝維他奶

四驅車夠型仔，上山落山應付自如，七人車載客量多，夠晒實用，兩者在市面多的是，但要一架兼備七座位的四驅車，選擇不多，鈴木七人版「維他奶」就是其中之一，最近呢部大四驅又推出新版本，所謂新版，查實係由外表到車廂設備再到性能都嚟一次大包裝，為七人四驅車市場加多一個NewChoice！
記者：黃婉冰
攝影：陳盛臣
ImageGirl：Trina

■新車用上4×4陣式底架，但前後泵把就比舊款較長。

■新車不止在外表上有所改變，就連性能及馬力輸出亦有所提升，「維他奶」捧場客又多一個款揀。

新版本：高檔×年輕
對比上一代XL-7，驟眼睇外形分別並非太大，雖然未至於畀人一種「嘩」一聲的脫胎換骨之感，但車頭造型的少許改變，感覺又可以第一時間給人一種年輕化的新鮮感，鬼面罩加上鍍銀邊裝飾，扁長車頭燈罩改為較大同流線的梯形，賣相簡約起眼，擺脫舊款給人死板板之感。車廂設備同時亦有升級改變，特別是以桃木鑲嵌的表板及波箱，配備恒溫式冷氣及簡單的圓形按鈕，若記得上一代款式的話，新版本明顯更受後生仔歡迎，而且車身離地面只有183mm，一般1.8米高的停車場都絕無問題。

新版本新設計

Sharp醒電鍍鬼面罩
■新車鬼面罩加入銀色電鍍邊裝飾，比舊款Sharp醒得多。

梯形雙圓頭燈
■梯形車頭燈襯埋一大一細組合，線條簡約，配合流線型車頭簡直一絕。

鍍銀表板
■表板比舊版只作少改，銀邊造型望落都後生啲。



波箱提升至5前速
新車在性能方面亦有所提升，最大改動是由舊款的4前速自動波箱改為5前速，馬力亦較之前的177匹提升至184匹，行車表現亦相對提升，當然，作為一架在市區行走的四驅車來說，2700cc的確足夠，但若然載滿七位乘客的話，表現會略為遜色。以22萬買到一架市場不多而又設備不錯的七人四驅車，這點確是此車的吸引之處。

其他搶鏡設備

三點式安全帶
■新車中排中間位添加了頭枕同三點式安全帶，安全性比舊有的高。

改桃木裝嵌
■雖然話係標準版，但中控台同波箱一樣改用桃木裝嵌，擺明玩高檔！

恒式冷氣
■新設恒溫冷氣，加上多個獨立出風口，每個角落都涼得到。

放低椅背
■車尾空間啱啱好可以擺放哥爾夫球袋，尾箱地台下又有暗格位可以放其他濕碎雜物。

■將最後排座椅椅背放下就可以有更大的空間，放架小朋友單車都重得！



其他七座位四驅車

■車廂最後一排雖然未至於好寬敞，但勝在中排座椅可前後滑動，上落方便。

■側鏡同車身顏色一樣，想搶鏡可以加錢換個銀色電鍍鏡。

■四驅波箱後面有個有蓋煙灰盅，唔怕煙灰四圍飛。



SuzukiGrandVitaraXL-7Profile
引擎： 2736ccV6DOHC
馬力： 184ps/6000rpm
扭力： 25.5kgm/3300rpm
傳動： 5前速自動波
懸掛： （前）麥花臣（後）五連桿
制動： （前）通風碟（後）鼓式
輪胎： 235/60R16
尺碼： 4760×1780×1740mm
軸距： 2800mm
車輛提供：香島汽車（23320091）
註：Deluxe版較標準版多了天窗及皮椅，車價：$259,900

越野路華Discovery$389,000
四驅車中最受歡迎又最經典的款式，3900cc五前速自動波，設備貫徹歐洲車所具備的高度舒適感，車廂寬敞唔在講，車身亦較高，新一代車款將會在明年發售。

五十鈴Trooper（未有提供）
品牌及車款都稱不上普遍，引擎容積及馬力都較高，3494cc可輸出215匹馬力，不少玩四驅爬山的愛好者都會選擇此車，但論車款外形，始終及不上其他品牌。