全國政協委員何世柱，剛以一千三百五十萬，向美心集團伍氏家族，購入跑馬地藍塘道五十一號地下，二二○○呎，每呎六千一。
佢之所以睇中呢幢樓齡逾半世紀嘅三層高住宅，原來同何家好有淵源，除咗本已擁有頂樓，喺正隔籬，與五十一號好似孖屋一樣嘅五十三號，係何氏家族物業，由佢老父、老牌建築商福利置業創辦人何耀光，五十年代買地自行興建，自住至今。
聽講，何家有意買埋五十一號一樓，統一業權，之後重建。不過，作風低調又保守嘅何氏父子，似乎唔急於收購，向來鍾意長揸物業收租，早年買落嘅物業，大部份用嚟出租，個別位置優越嘅，都係因為俾大發展商睇中，先至合作重建。最經典係與長實合作嘅西環高逸華軒。
近排入唔少貨嘅蒙妮妲集團鄭明明，買樓之餘，又與發展商合作，舉辦美容及造型指導課程。新鴻基地產土瓜灣農圃道十八號，走精品豪宅路線，針對講求生活質素與品味嘅買家。
新地早前請李純恩做旅遊飲食顧問，今趟搵嚟專門教人扮靚嘅鄭明明助陣，向樓盤業主教授皮膚護理、化妝及髮型設計等技巧。
早前新地賣油麻地窩打老道八號，鄭明明買咗十六個單位，今次更親自為新地授徒。
佢重話，農圃道十八號用Gucci做主題嘅複式幾好，有啲興趣喎。
新品牌要人識，宣傳當然唔少得，近排積極拓展二手市場嘅京士活物業代理，規模唔大，都落重本宣傳。
蘭西噚日見到佢哋個電視廣告。京士活物業代理執行董事劉軒成話，廣告出咗一周，連製作費成二百萬。另有報紙廣告配合。𠵱家剛剛起步，希望建立品牌。
成效係點，佢話品牌嘅嘢，要慢慢儲返嚟，現階段係想多啲人識。除咗廣告，喺京士活唔同地區嘅分行放盤，都會有啲優惠送畀啲客。劉軒成話，希望吸引多啲街坊客，爭取生存空間。
銀行向測量師行查詢估價，係樓市寒暑表。早幾個月重做到三更半夜嘅測量師，上個月突然清閒好多。中原測量師行高級經理周文略話，上月銀行口頭估價查詢，減少兩成三，反映樓市降溫。三月升一成八，二月升六成六。
其實，四月一二手成交都比三月少，一手減六成二。
周文略認為，美國可能提早加息，內地加大宏觀調控力度，會加速樓市進入短暫調整期，下半年會唔會反彈，就要睇整體經濟表現，同埋發展商一手新盤銷售攻勢。
全港第一個透過補價轉作loft概念工作室嘅工廈，葵涌維京科技商業中心，首批推出單位，反應唔錯，業主有意加推單位應市。
聽物業代理之一嘅美聯物業工業部區域營業董事陳偉志講，買家主要係用家，從事設計同貿易等行業。好似其中一個買家，係中港貿易商，喺觀塘已經有自置物業，今次增購維京單位，係作為擴充之用。
陳偉志話，同區五六百方呎工貿中心單位，月租要五千蚊左右，但買入維京嘅每月供款，只係三千零，咁梗係受歡迎啦。
蘭西
電郵地址：
