三位香港居民、歐籍商人，喺菲律賓度假小島Boracay被謀殺，聞者惜之。左丁山未去過Boracay，完全冇印象，只係奇怪呢十幾年嚟，菲律賓治安不靖，盜賊如毛，綁架無日無之，遊客點解要去菲律賓？
律師W話：「你就孤陋寡聞啲，Boracay個島好靚，沙灘長，海水清，係潛水勝地，我去過吖，真係好靚㗎，外國人都唔知幾鍾意。」
珠寶L原來去過好多次，每次都驚險刺激。珠寶L講：「呢個島中文叫做長灘島，沙灘有個特點，就係類似懸崖，開頭水淺，行行吓就突然跌落深水。呢類沙灘，最適宜養蚌。日本養蚌業已經死晒，因為日本海面污染，蚌不能生存，甚麼採珠女郎，只係做戲畀遊客睇。世界三大珍珠生產地就係澳洲、印尼、菲律賓。長灘島有養蚌場，每到收成季節，海外買家就到長灘收貨。啲匪徒計啱時間，到時到候去機場吼實，香港人、日本人客到埗，就知道外國珍珠買家殺到，立即跟蹤，我自己去過幾次，每次都有保鑣揸機關槍隨身保護，攞咗貨之後，去機場嘅路線嚴守秘密，兩批保鑣分開，一批開船，一批揸車，故意掩人耳目，等啲匪徒估吓我在船上還是車上，好刺激呀！」做戲咩，但為咗買珍珠，唔去唔得，珠寶L話去得多，就覺得係閒事！
餐廳羅原來上星期去咗宿霧（Cebu）度假，與馬尼拉富豪打波。馬尼拉富豪帶來十一個保鑣，手持M16貼身保護佢兩位。唉吔，大把地方好玩，點解要去菲律賓？諗唔通。