甄妮一連三場喺紅館搞嘅演唱會前晚結束，佢做完騷心情格外靚，重話最開心係收到寰宇嘅信，甄妮話封信內容係寰宇承認爭佢錢，但寰宇老闆娘林小明太太就話封信係追討甄妮欠款先啱，馮仁昭覺得呢單嘢都好羅生門喎！
講到甄妮同寰宇啲錢銀轇轕，佢話：「條數計完都係唔清唔楚，我會叫會計再計過，然後send番畀佢哋，總之佢哋就爭我錢。」甄妮又不忘窒林太，佢話：「我見過嗰個女人一次，我係同佢屋企個男人傾嘢，有事就搵個女人出嚟鬧，女人同女人嗌交好惡心，邊個做就邊個出嚟講，唔知嗰啲就唔好出聲！」重話以後唔同佢哋合作㖭。
林太噚日喺電話回應話：「嗰封信其實係寰宇追佢五位數字墊支費，我唔明佢點解為咗宣傳要不擇手段，扭曲事實，我隨時準備咗嗰封信可以公開，佢話我講大話可以攞證明出嚟，唔使縮吖。」
甄妮又爆個女Melody有一晚去同觀眾握手，突然有個觀眾好惡咁話佢肥，叫佢減肥，搞到Melody好唔開心，甄妮話：「我同個女講，冇可能全世界都鍾意你，有媽咪嘅愛咪夠囉。」
黃凱芹就快喺紅館舉行演唱會，佢噚日就同黃伊汶喺尖沙嘴排舞，不過企喺高過佢成半個頭嘅黃伊汶後面，黃凱芹即時變咗成個小矮人咁，再加上佢跳到雞手鴨腳，黃伊汶又笑佢手短，黃凱芹重話：「好少攬人條腰攬咁高，我都驚攬錯其他地方。」咁多烏龍嘢，到真係表演時都唔知會點
戴辛尉噚日向傳媒大吐苦水，話最近喺冇定明合約下被一纖體食品公司利用作宣傳，要求對方道歉或發出聲明，戴辛尉話：「我覺得咁樣好似俾人強姦一樣，我哋冇簽合約，又登我張相話我食呢隻產品瘦咗，其實我係食另一隻纖體食品而瘦，有記者向嗰間公司詢問，對方重話我博宣傳，我會保留追究權利。」
無綫明珠台上星期五晚一連播出《真碧咸》同《碧咸一號情人盧絲》兩個節目，結果前者平均有二十八萬觀眾，而後者平均就有三十二萬觀眾，證明觀眾鍾意睇盧絲數臭碧咸，多過睇碧咸老婆Victoria晒幸福。另外，胡杏兒主演嘅《下一站彩虹》上星期收視微升兩點，平均有二十七點，即一百七十七萬觀眾，成績都算唔錯。
李克勤噚日去港台接受訪問時話到自己今年好忙，所以唔會有時間結婚同生仔，而且佢重未諗到用乜嘢形式去舉行婚禮，但係佢就好堅決咁話一定唔會擺酒。不過克勤就話女朋友都冇因為今年結唔成婚而失望，克勤重好抵死咁話：「我女友只要見到銀行有進帳就會好開心。」
