疾病令阿冰的人生充滿苦澀，惟人間溫情，教她重拾甜絲絲的感覺。單親的阿冰，因其腦瘤復發愁對醫療費的遭遇經本報報道後，獲善長捐輸逾11萬元，她萬分感激之餘，亦決定將其中2萬元撥捐蘋果日報慈善基金，幫助其他有需要人士。
一直困擾阿冰的腦瘤問題，上月終於有了結果。「磁力共振掃描睇到我左邊腦真係有個瘤，不過好彩唔算好大，大約好似粒花生米咁，因為我早幾年已經開過一次腦，所以醫生唔建議我再開，𠵱家佢暫時畀藥我食，睇吓可唔可以打散個瘤。」阿冰向記者述說她的最新病況。
48歲的阿冰，近十年健康每下愈況，她患過子宮頸腫瘤，亦有心臟病，頸骨及腰骨同時退化疼痛，需長期服食止痛藥物，約七年前，阿冰更動過手術，切除右腦內如雞蛋般大的良性腫瘤。
近大半年，阿冰經常出現不尋常的頭痛、暈眩等病徵，醫生懷疑是腦瘤復發。為了確定病情，她需要接受磁力共振掃描，但在公立醫院排期至少得等一至兩年，院方建議她自費往私家診所檢查，但貧困的阿冰根本無力負擔有關費用。
阿冰為單親媽媽，獨力撫養一對現齡分別22歲及14歲兒子，長子現就讀大學二年級，幼子念中二，一家三口靠綜援金生活。蘋果日報慈善基金較早前曾撥款17,000元，助她支付檢查費用。
「上次好彩得你哋幫忙，我先咁快知結果，我將個報告交咗畀醫院，醫生再幫我抽腦細胞檢查，亦都證實咗個腦瘤係屬於良性，𠵱家我先叫做冇咁擔心。」阿冰鬆一口氣說。
在病榻中孤單無助的阿冰，其不幸遭遇得到不少善長同情，蘋果日報慈善基金合共接獲114,080元指定捐助她的善款，令阿冰深深感受到人間溫情。「我一直覺得自己條命好苦，細細個父母已經唔喺度，婚姻又唔如意，最慘重有一身病痛，但經過今次，我先知原來呢個世界重有咁多人關心自己，感覺好溫暖。」
阿冰表示，由於治療腦病的歲月漫長，加上長子自兩年前升讀大學以後，根據社署的綜援條例規定，已被終止其生活費及學費津貼，故她打算運用善款作為醫療及兒子的教育經費。「醫生本來建議我食一種特效藥，呢隻藥係專門針對腫瘤，但隻藥醫管局唔會資助，全部要自己畀，每粒要成80蚊，一日要食兩粒，一個月加埋就要成4,800蚊，之前我因為冇錢，一直冇食，𠵱家有善款幫補，我會即刻試吓。」
經歷厄困的阿冰獲雪中送炭，她決定將善款中的2萬元，撥捐蘋果日報慈善基金，幫助同路人。「我今次真係全靠蘋果基金同各位善長仁翁，先過到今次難關，所以我都想出番少少力，幫番其他同樣有需要嘅人。」 捐款編號：C1295
暖流熱線
電話:29908688
傳真:23702192
電郵:
網址：