日股勁挫逾500點，疲態畢露的港股當然頂唔住，恒指全日急挫425點，收報11485。國企指數更大跌7.7%，跌破4000關。
黑客話，由於美元轉強令區內貨幣滙價動盪，有資金流出香港，噚日181億元成交中，唔少來自基金沽盤，當中不乏止蝕盤，基金出貨的原因仍然唔清楚，但相信只是開始，沽壓可能持續。至於國內的宏調，相信中央要睇清楚近期世界局勢才會再推新措施，但就唔好以為中央五一後不加息，就可以放心炒國企。
中電信（728）又傳話本周內配股集資187億元，但見到噚日市況，被迫押後至市況轉佳為止。聽講近期中電信累積唔少空倉，如果押後兩個月至配股，中電信可能會出現挾空倉。唔單止大抽水機開唔着，連細抽水機都死火，澳門實德（487）原本諗住配股畀一個大戶同埋其他機構投資者，但一樣衰收尾。
股市噚日大跌，重磅地產股新地（016）同恒地（012）分別跌逾4%及8%。東方燃氣（2915）更大跌12.3%，收2.50元，連配股價2.65元亦跌破。配售交易噚日剛完成，據聞好多人都未及沽貨，噚日成交股數313萬股，金額807萬元，真正沽盤都未湧現，已經跌破配股價，相信東燃可能要見1.80元，即係小小超嘅入股價。
褲王楊釗因為不滿九龍灣規劃改變，增加同區商貿地皮供應量，令到佢喺98年買落嘅商業地皮價值下跌，向政府索償逾5億元。如果褲王贏得呢場官司，照計全港所有業主都可以因為「八萬五」改變樓市政策，控告政府提出索償。
阿虎