作為美國人嘅恒隆主席陳啟宗經常大罵民主派，原來佢對老董嘅怨憤一樣好深。噚日佢自己喺香港發展論壇研討會上，竟以街頭語言，痛斥老董「係唔係都拿屎上身」，新機場出事又要攬、雞瘟又要攬，如果你大把本錢都冇所謂，「但你周身屎，再拿上身就多啲屎！」
陳啟宗又數臭老董，身為特首但又冇政治手腕、又冇魅力，有政治理念但唔識sell就等於冇理念，冇政治手腕就死硬，三項能力都「食蛋」就好大鑊，好似個學生咁，「中英數三科得○分，體育、物理、化學、音樂全部攞一百分都冇用！」
陳啟宗可能驚中央拍枱，鬧鬧吓清醒番，都幫老董講兩句好話，將部份責任賴落傳媒身上，話香港所有傳媒個額頭都鑿咗個「反」字，但支持政府嘅《文匯》、《大公》又冇人睇！（若然係實情，又點會得《蘋果》一份受盡政治迫害，俾人抽廣告？）連陳啟宗呢啲袋本US護照又咁親中嘅商人，都咁樣踐踏老董，當正老董已經下台一樣，老董管治真係名存實亡。
傳真︰2623-9278
電郵︰