恒指大跌425點，期指大跌483點，呢個跌幅，出乎市場意料之外。噚日亞太區股市全面崩圍，日股急挫554點，幅度4.84%；台股急跌215點，幅度3.56%。日股有恐怖襲擊驚魂，美駐日使館發電郵畀美國公民，話今個禮拜可能會遭炸彈襲擊，搞到人心惶惶；而台股則受到「總統」大選開始驗票影響，未來的十日八日，形勢會好唔穩定。
至於港股，跌幅3.57%，期指更大跌4.1%，連11300大關都失守，低收11299，大低水186點。噚日恒指以點數計，係去年10月23日以來嘅紀錄，中國宏調加深，本港資金繼續外流（金管局又沽出2000萬美元），壞消息繼續浮面，投資者已由虛怯而變成恐慌。
睇情況，今次跌市，「一次過」跌夠的可能性，愈來愈大。去年開始嘅大升浪，升咗5727點，𠵱家已調整咗升幅的0.382（11870），向升幅的0.5（11194）進發。恒指噚日低收11485，連250日線（11643）都冇支持，成交則大增到181億元，沽盤重係好重，看來11200水平呢個重要支持位，或會受到考驗。
恒指由高位14058回落，歷時兩個多月，走勢形成下降通道，短期通道底部在11350水平，唔排除到位會出現反彈。黎明前一刻，永遠係最黑暗嘅。
國企跌得重「金」，國指3900失守，低收3897，大跌325點，跌幅7.7%，成交亦大增到近40億元。國企今次先被宏觀調控拉落井，再捱多美國會提前加息引發大跌市嗰幾嚿大石頭，傷勢愈嚟愈重，而宏調重點打擊嘅行業，股價更無休止咁跌。有誰料到，企業盈利大增之時，都會出現股災。
原料股跌得最急，江西銅業（358）低收2.5元，大跌18%、重鋼（1053）跌15.1%、鞍鋼（347）14%、中鋁（2600）13.3%、馬鋼（323）10.1%，以及安徽海螺（914）跌9%。至於有大行推介可以低吸的石化股，跌幅亦唔細；上海石化（338）唔見15.1%、北京燕化（325）13.4%、鎮海煉化（1128）亦冇咗11.5%。
由高位起計，好多國企都跌咗5成。不過，有危先有機，急跌股第日升起上嚟，一樣會好勁。
郭兆誠