立法會資訊科技及廣播事務委員會差啲「流會」！噚日兩點半夠鐘開會，但仍只得霍公子震霆同羅致光兩位議員，好彩楊孝華喺兩點九趕到，否則肯定會流會。其後，馬逢國、飛天朱同埋李華明都相繼抵達。
噚日會議有一部份講到政府資源緊絀，諗住明年唔搞一年開支預算只係四百二十萬、兼夾真係有好多人用嘅「IT話咁易」服務，與會議員即刻話反對。馬逢國話呢個服務係「超值」，係「難得政府用咁少錢做到嘅德政」。委員會主席單仲偕更話，政府搵盧維思或其他人求其搞個研討會，都使幾十萬蚊，咪又唔知有冇經濟效益！
至於楊孝華，八方真係想借呢個機會講句，雖然佢次次都好盡責發問同提意見，但講嘢一嚿嚿，八方始終聽唔明佢講乜，唔知係咪講緊蒙古話，唔知可唔可以搵人幫佢繙譯呢？
（圖）好彩楊孝華最後都有出現，如果唔係資訊科技及廣播事務委員會會議就會流會。
傳真︰2623-9278
電郵︰