摩納哥嘅克羅地亞國腳前鋒柏素，都算係目前轉會市場中炙手可熱嘅前鋒之一，不過，佢有AC米蘭等其他歐洲大球會唔加盟，偏偏選擇今球季結束後轉會蘇格蘭超級聯賽隊格拉斯哥流浪，就真係令我求大俠𢱑晒頭。
係人都知蘇超聯唔算得係歐洲頂級聯賽，而且流浪近屆成績亦俾些路迪壓住，就算佢哋嘅領隊麥利殊猛話下屆要重組挑戰些路迪嘅地位，相信都難同歐洲頂級大球會比較。不過，二十九歲嘅柏素就一於少理，決定加盟流浪，七月正式報到，重一簽就簽三年，似乎想喺蘇超掛靴。
好明顯，柏素係寧願喺蘇超聯做皇帝，都唔去其他歐洲頂級聯賽做妹仔。蘇超聯耐唔耐就吸引到出色球星加盟，好似之前丹麥嘅白賴仁勞特立同埋瑞典嘅拿臣……睇嚟我求大俠要進一步求驗吓蘇超聯嘅魅力先得！
大家重記唔記得烏甸尼斯嘅「發霉」德國前鋒贊卡呢？呢名前拜仁前鋒加盟烏甸兩季以嚟，加埋上陣得三十七場入咗兩球。不過，佢咁都獲凱沙羅頓羅致，但合約講明如果凱沙羅頓今屆護級失敗，就一切作廢。睇嚟，贊卡喺餘下嘅德甲聯，一定要全力為凱沙羅頓打氣至得。
孫繼海效力嘅曼城就逃出生天，但係佢兩位師弟邵佳一同董方卓就冇咁好彩，董方卓效力嘅安特衞普降班幾成定局；而邵佳一嘅慕尼黑1860慘吞羅斯托克三蛋後亦勢危。董初到歐洲球壇，打乙組都可以當吸收經驗，邵佳一就慘情，若踢乙組就同當年楊晨一樣，想有進步都難！
祖雲達斯前日贏森多利亞場波，係本季最後一場，亦係「銀狐」納比最後喺主場領軍嘅聯賽。佢賽後繞場跑幾百米同球迷揮手道別，都幾感性。呢場波就靠今季兩個失敗收購––歷高達利同埋艾比亞入波，為納比送別。查實假如佢兩個今季爭氣啲嘅話，或者納比唔使淪落此田地。
阿祖安奴前日幫國米一腳射垮帕爾馬，呢個入球好可能幫國米躋身下屆歐冠盃。國米當日用大概二千萬歐元買「阿祖」，誇張啲講呢一腳已經夠歸本。「阿祖」季初幫帕爾馬射入好多波，估唔到對帕爾馬最致命嗰腳都係佢入，真係成也「阿祖」、敗也「阿祖」囉。