四月三十日下午，收到仙道彬來電，證實有關「波神」佐敦來港的消息，心情就沒有平復過。
四月頭已經有線人講過呢件事，但無法證實，加上北京有沙士，波神又點會去呢？講出來一定俾人話我「黐線」，所以惟有當冇事發生過。直至早前舉行雷射Party，先至初步證實，波神真係會來香港！
同我一輩的，通常唔係迷譚詠麟就係張國榮，我就冇乜偶像；直至九一年響「無綫」睇到「NBA美國職業籃球盟主爭霸戰」，就迷戀上佐敦。當時買唔起佢對AJ6，要到三年後，先擁有佢第一對波鞋──學名「佐敦一代復刻版櫻木花道色」，係趁特價響中藝買的；之後發下毒誓：我一定要儲齊咁多代佐敦鞋（當時去到十代）兼要親眼見MJ，先死得眼閉！從此，見MJ就成為我死前必做的十件事之一！
要達成此心願並不能守株待兔，台灣波鞋網某站長ED兄撲到飛叫我去，但我又走唔開；好彩下星期去大陸出差，順便留兩晚響北京（十八至二十號）；但係大陸佐敦波鞋展搞手又未確定能否為我安排，香港方面全程保密無計可施，惟有參加「fans曬冷」比賽碰碰運氣！
下回我將會到達上海，欲知我能否見到MJ，請看下回分解！
Hleung──波鞋網站
Email: