歐洲聯賽冠軍盃決賽，由兩支冷門球隊摩納哥與波圖爭霸，賭波版話係歷來最冷門嘅決賽，如果你舊年就買齊呢兩隊係歐洲冠軍，肯定贏大錢，但係歐洲足協就頭痛，一來驚住入座率唔高，二怕電視直播收視率大跌，三怕是但一隊攞冠軍，都搵唔到超霸杯（歐洲冠軍對南美冠軍）贊助商。
我哋唔使咁庸俗，一定要曼聯對皇馬或者阿仙奴對AC米蘭嘅。金錢雖然支配足球，有錢佬可以大大聲，好似車路士班主俄國大富豪咁，而有錢球會如皇馬、曼聯的確贏過好多冠軍，但係，體育之引人入勝，之令我哋對人生充滿希望，就係有錢佬未必大晒惡晒，窮人球會仍然有希望，只要上下團結，教練好、球員搏命嘅話。
葡萄牙波圖、摩納哥嘅摩納哥都係細球會，但兩隊喺進軍過程之中，踢走咗曼聯、皇馬、車路士三大明星球會，佢哋陣中所有球員加埋嘅身價，唔夠買碧咸、施丹、費高。摩納哥嘅摩連迪斯俾皇馬睇唔起，借去畀摩納哥，但摩連迪斯大打爭氣波，場場有入球，令到啲有錢班主眼前為之一亮。
摩納哥對波圖，係窮人嘅勝利，係體育嘅勝利，證明有志氣嘅窮人，仍然可以攀登高峯，屋企請補習教師，讀貴族名校，唔代表喺考試時可以一定贏橫頭磡順嫂個女！歐洲四大聯賽，西意英德，冇一隊打入今年嘅歐洲冠軍盃決賽，可以燃點起各地球員嘅幻想，刺激足球再進一步。