最近有唔少無綫藝員同員工同馮仁昭投訴，話無綫喺將軍澳嘅電視城蚊患嚴重，每日開廠大大話話打死幾十隻蚊，咬到佢哋手腫腳腫好鬼辛苦，尤其係十五廠同十六廠情況最嚴重。
好似佘詩曼、康華同廖碧兒幾位靚女就曾經身受其害。廖碧兒話：「啲蚊針到我塊面腫晒，搞到我好𤷪𤺧，啲工作人員就成日攞塊電蚊拍拍蚊，我就惟有帶藥油開工囉！」
佘詩曼就話：「雖然我唔係點惹蚊，但咁多蚊梗係唔鍾意㗎啦！」康華重慘，佢試過俾蚊針到腳腫，佢話：「唔知點解近排啲蚊好厲害，我已經着晒長褲同狂噴蚊怕水，但都針到對腳腫晒，而且重試過針到眼㖭！」
無綫近排除咗請專人滅蚊之外，重請人入無綫做評估報告，發現近期蚊患係同附近嘅垃圾堆填區有關，佢哋已經向食環署投訴，希望改善附近環境。
丁子峻日前喺泰國曼谷潛水發生意外，有啲傳媒報道佢嚴重受傷，直至噚日丁子峻發相畀傳媒，原來只係擦損手腳，傷勢好輕微啫！最抵死係有內地傳媒報道，話丁子峻部內地劇集《滴血翡翠》就嚟出街，所以佢經理人方面小事化大，乘機做吓宣傳囉！
內地歌手毛阿敏二月底喺上海秘密產女，由於佢唔想俾傳媒騷擾，所以對生BB嘅事好低調。噚日母親節，有內地傳媒打電話畀佢，想訪問佢第一個母親節有乜感受，毛阿敏話：「我不想接受採訪，我只想安靜地與女兒度過這段日子，請不要為難我。」
吳宗憲噚日喺台灣開記者會，為醉酒兼無牌駕駛一事公開道歉，佢話冇時間考車牌，亦承認嗰日飲咗酒，但佢話藝人因拍戲同劇情需要，成日會無牌駕駛，馮仁昭都覺得佢冇乜誠意道歉。而坐喺佢車度嘅三個女仔又露乳又露股罅，佢話：「連臉都顧不了，哪有時間顧她的屁股露出來！」
着低V背心嘅名模Rosemary，噚日同媽咪Julie往尖沙嘴美麗華酒店出席母親節聚餐，Rosemary話最近媽咪成日失眠，所以送咗啲香薰按摩油畀佢做母親節禮物，噚日又一早起身洗車同打掃屋企，等媽咪休息吓，難怪Julie噚日笑到見牙唔見眼，我馮仁昭都戥佢心甜！
