美國女歌手BeyonceKnowles同埋佢嗰個rapper男友Jay-Z，因為得到英國皇儲查理斯王子賞識，所以獲邀出席前晚喺倫敦Earl'sCourt舉行嘅皇儲基金城市音樂節，為年輕音樂人籌款。當晚Beyonce同男友Jay-Z以情侶檔上陣，唔使問阿貴，佢兩個梗係全場嘅焦點啦！
前晚舉行嘅音樂節有四萬位觀眾入場，前一日先喺紐約為電影《烏龍幫辦》開完記招嘅Beyonce，當晚以一條黃色嘅性感短裙仔上陣，豔光四射，真係一啲疲態都冇。佢之後又同男友Jay-Z大跳辣身舞，觀眾當然睇得好開心啦！
雖然當晚查理斯王子唔得閒去睇佢兩個表演，不過喺之前一日，Jay-Z同查理斯已經喺倫敦西敏寺大學會過面。為咗隆重其事，Jay-Z重着住套老西見王子，其間有人問王子有冇留意時下嘅流行音樂，王子就話自己都有聽過吓，不過始終都唔講識唔識Jay-Z嘅歌。而Jay-Z見過王子之後，重猛讚查理斯王子好有型，咁識賣口乖，真係抵佢咁襟撈。