美國驚加息，上周五美股散落嚟。西方國家，對本港政制繼續指指點點。港股暫時都係向下，上周五全日低位11835（收11910）相信會失守，啲Put輪再領風騷。
中銀（2388）今日除息0.32元，長實（001）與和黃（013）明日分別除息1.30元與1.22元。3隻恒指成份股將總共拖低恒指36點，對短期恒指Put輪有利。遲吓，滙控（005）與恒生（011）除息，又再拖低恒指。
短期恒指Put輪成為炒作焦點。9213下個再下個周一最後買賣，輪價19.7仙，溢價0.8%，槓桿率12.1倍。如果用期指做計數基準，實際已經平水。其他可以留意嘅Put輪有9437，下月底到期，溢價得1.6%，槓桿率8.1倍，不過呢隻成交較疏，短炒始終冇9213咁啱。所謂短炒，可能只係講緊3幾日，留意夠鐘日子逼近。
大藍籌嘅Put輪，有唔少都係溢價非常低者，得兩三個巴仙甚至更低，滙控、長實、和黃、新地（016）等個別Put輪，數據相當吸引，如果有除息，溢價更低。但呢啲輪普遍交投好疏，買賣未必貼價。如認為佢哋會跌，不妨從行情表上搵一兩隻短炒。不過，太多壞消息一齊出現，個市又跌咗唔少，𠵱家炒Put輪，要睇埋風險嗰便。當幾乎全人類睇淡之時，可能就係大市見底之日。
章盛