上周六同經紀黃去吹水，佢話因為加息陰影同埋大陸宏觀調控，令到唔少好股票被沽過龍，其中一隻係創維數碼（751），但外資大行同埋芬佬並未離棄。
創維數碼近期股價跟隨大市回落，由最高2.95元，跌至上周五收市2.225元。芬佬界認為創維股價下跌，純粹跟資金流走有關，唔係公司基本因素改變。
經紀黃引述證券行報告嘅數字，話創維今年3至4月期間，所生產嘅電視機在大陸銷售繼續錄得增長，當中主要受惠於高檔嘅數碼電視產品，呢類產品毛利率較高，所以創維現時股價回落，反而係吸納時機。
經紀黃重話，早兩個月創維股價仍然堅挺之時，市場曾傳聞某證券行提議創維批股集資，但被公司拒絕，原因聽講係未到價，所以當大市回升時，將係創維股價反彈之時。雖然小初冇懷疑經紀黃所講，但呢排大市表現確係令人氣餒，都係少做少錯。
慕容小初