噚日又係一年一度嘅母親節，面對囝囝囡囡講金又講心嘅禮物、「情書」攻勢，一班平日外表幾咁強嘅「媽咪級」女強人，都冧到「阿媽都唔認得」。
人大封殺雙普選搞到前任政務司司長陳方安生唔多高興，到咗母親節，陳太就變番「四萬」嘅高興樣。陳家噚日四代同堂，一齊食飯慶祝，陳太重以招牌嘅四萬笑容同八方分享做太太要有三德，即係「做得、忍得和睇得」；但八方一問到佢覺得佢接班人曾蔭權有冇變節，四萬就即刻封嘴唔講。
為咗政改，當奴曾好似食咗祖國嗰隻問題奶粉咁，個頭大晒，但佢太太曾鮑笑薇，身為香港女童軍總會副會長，噚日出席一個烹飪比賽後，就話自己冇乜壓力，重同出席同一場合嘅何志平太太胡慧中傾得好開心，又問人幾時追多個仔，胡慧中話：「生仔唔係一個人努力就得，我老公工作好忙㗎！」咁係咪即係怨個老公唔同佢生呢？
何太又話，母親節收到囡囡親手穿嘅膠珠鏈，「個女親自幫我戴條鏈，真係心都甜晒！」知道係學校教佢整嘅時候，何太重覺得「交幾貴學費都心甘命抵。」女人真係好易滿足㗎咋。
至於身為兩子之母嘅教育統籌局常任秘書長羅范椒芬，噚日一早就收到明智地冇選擇喺香港升學、正在外國讀書嘅乖仔電郵，祝佢母親節快樂之餘，重寫上「Mother,Iloveyou（媽媽，我愛你）！」冧到羅太甜到入心。
傳真︰2623-9278
電郵︰