前大法官李福善，加入市民抗爭行列，老人家成八十幾，一樣企出嚟反對填維港，重怒斥呢個特區政府「下流」，重話，若果要抗爭，要有三百萬市民出嚟遊行！
港區人大李鵬飛，毅然代大班開咪，繼續發揮風波茶杯精神，夥拍才子梁文道，同自從大班走咗就成個生晒、由「慢打鑼」升格為「快打鼓」嘅林旭華，繼續為民喉舌，痛斥港奸，《風波裡的茶杯》至今幸未跌Watt！
李福善係一九九六年「競選」特首嘅四大候選人之一，經中央人民政府照肺，梗係確定為靠得住信得過，先至批准佢當年入閘，同愛國商人老董一齊陪跑！雖然結果內定，但李官做人民咖喱啡，立下歷史大功，係人民政府嘅自己友，呢一點毫無疑問！
而李鵬飛則係港區人大代表，做得呢個位，唔止係照過肺，重係驗埋血、做埋腦部磁力共振，兼將個基因圖譜，全套Print出，送交中南海化驗，一切OK之後，先至獲得呢項獎賞！
因乜事李福善同李鵬飛，都企埋出嚟反董反政府？唔通佢哋又係外國勢力收買？李福善住渣甸山豪宅，家族大把錢，點樣收買到？至於李鵬飛，跟前朝港督高佬麥出身，過渡期一度棄英投中，轉飲愛國奶粉，就算美英想收買，都會揀過件一手嘅嚟買吖。
前朝「雙李」睇唔過眼，雙雙發表良心言論，特別係李福善，話呢個政府「下流」，大法官嘅判詞，往往係一言九鼎，經大腦過濾策劃好多轉數，先至敢出聲。李福善唔同長毛，李大法官一句「下流」，實有春秋鐵筆嘅功力，好似當年紐倫堡國際法庭審訊戰犯咁，判詞一字一句，都成為歷史文獻！
李福善家族出身香港本土世家，正一係飲香港水、流香港血，佢李氏家族有良心嘅正義之士唔少，好似佢千金李志喜、姪仔李國寶，重有久不久講嘢都幾豪放嘅李國章，講到「愛國」，一樣有做過聯交所主席喺八七股災大喝澳洲鬼佬記者收聲嘅李福兆，重有今時今日喺終審庭力保香港司法獨立精神，按基本法辦事嘅李國能，以阿爺「善伯」為首，呢個「李家之城」，由殖民地時代到今日，我哋香港人先至知道，原來對香港嘅公義精神，有咁舉足輕重嘅影響！
善伯同飛哥，唔通又係「漢奸」？點解連一啲咁忠直嘅人都頂呢個政府唔順？北京同佢喺特區嘅擦鞋奴，醒吓喇！
傳真︰2623-9278
電郵︰