華置喺年初透露，有意改造尖沙嘴東英大廈，變身成九龍區皇室堡，可能會大規模翻新，又或拆咗佢重建。蘭西早前行街經過，見該大廈外掛起一個橫跨兩間地舖，高約兩層樓嘅巨型廣告牌，不禁有啲嘢諗。
呢幅面向彌敦道，行人川流不息嘅廣告牌，行內估計每月廣告費動輒過百萬。𠵱家零售業復甦，商戶生意額又回升，估計唔少商戶都捨得賣廣告谷宣傳，華置喺此際加裝巨型廣告牌，相信係睇準市場有需求，順便賺多一筆！
蘭西心諗，個位若果順利租出，租期都應該有番咁上下長，即係話大廈有排都唔會拆卸重建住啦，睇嚟九龍市民都要逛住香港皇室堡先。
香港人買樓會有千百個唔同嘅理由，聽美聯分行助理區域經理曾貴傑講，最近有位客為咗車位問題，由西半山搬去北角半山，用三百四十八萬，買入富豪閣連車位中層A室，八百七十呎，呎價四千。據聞買家因會買多部車，遲啲會租多一個車位。佢住開嘅西半山樓就冇車位買，只可以租。
呢名車迷，買入新居較原居住單位大啲，兼多一個車位，每月供款重平咗。北角半山車位月租一千到千五蚊，但西半山就要成三千，買家愛車得嚟又幾精打細算。
樓市由三月開始，因為冇乜焦點新盤開賣，加上樓價喺高位徘徊，所以成交量減少。主要反映三月成交嘅四月份土地註冊處樓宇買賣登記，有一萬一千幾宗，比三月少一成八，跌幅主要嚟自一手登記減少，只得一千三百八十宗，比三月勁跌六成三。
蘭西翻查資料，發現呢個數字係舊年五月嘅一千三百零三宗以嚟新低，即係話一手買賣量回落至沙士時水平。不過樓價冇同步下跌，唔係就認真大鑊。業界話，上月一手登記大減，估計係發展商嘅賣樓策略有變，加上售價唔平，部份買家轉投二手市場。
產業署將政府物業管理工作外判，分港、九及新界三份合約，富城集團奪得新界區合約，負責管理五十五項政府物業，其中十四項係政府合署同政府大樓，二十五個政府宿舍同十六項政府設施。
富城其實喺九一年開始，已經有為產業署管理政府物業，○一年又攞到香港區五十項物業管理合約，夠晒經驗。
講開物業管理公司，因為不斷有新樓落成，所以要增聘人手。置邦物業早前嘅招聘日，有近二百人應徵，四成半成功進入最後一輪面試，結果取錄十幾人，要做管理員都唔係咁易㗎。
平價重售嘅將軍澳怡心園，旺到不得了，賣咗兩日重係人頭湧湧，同舊年三月第一次開賣，一個朝早幾個鐘就收工嘅情況，真係兩個世界。
各大代理行自然動員到場扯單，蘭西做咗個粗略調查，四間主要代理行中，美聯動員力最高，噚日起碼有一千人，中原就最少有五百人，利嘉閣二百，港置一百八十，以上只計長駐現場人手，未計臨時落場或帶客嚟嘅額外人數。
保守估計，單係噚日就有成二千個經紀，散布喺將軍澳寶琳站至怡心園之間，尤其寶琳站呢個拉客據點，幾十個經紀圍住途人，有啲後生仔沉唔住氣，推推撞撞，又大大聲喝罵，怨氣累積，幾乎釀成打鬥，好彩警察哥哥眼明手快，立即拉開，猛勸佢哋冷靜啲，事件才告平息。
蘭西
電郵地址：
