「未食五月糭，寒衣不入槓」呢句老生常談嘅說話，又係時候出場啦，因為六月二十二日（星期二）就到一年一度嘅端午節，距離𠵱家重剩番個幾月，眨下眼就到。
大使自細就好鍾意食嫲嫲親手炮製嘅獨家潮州糭，其他大酒家、大餅店出嘅糭，就算入面有幾多乾瑤柱、幾多冬菇，落足幾多料，大使都係食唔慣，原因好簡單，就係冇咗「愛心」兩個字。
端陽佳節嘅意義，唔單止係人人有一日假放、去吓城門河睇龍舟競渡咁簡單，而係一家人可以齊齊整整、開開心心咁食番隻糭，共敍天倫之樂。
之不過，唔係個個都有屋企人陪伴過節咁幸福，尤其一班獨居嘅長者，佢哋無論過年、中秋、冬至、聖誕、端午……所有大時大節都係孤伶伶咁過，想搵個人噓寒問暖都冇，大使有時諗起都幾心酸。
所以，唔少社會服務機構都會喺端午節搞一啲聯歡會同埋贈糭活動，等班老人家可以感受節日氣氛，而蘋果日報慈善基金一如往常，設立「蘋果愛心糭子2004」專戶，接受善長捐款，然後分發畀福利機構去買糭送畀長者。𠵱家蘋果基金已經收到十七間機構要求索取逾一千隻糭子，相信申請重會陸續有嚟。大使喺度呼籲善長捐款唔好手軟，你只要捐出十元八塊，就可以令一個老人家開開心心過節，何樂而不為呢？
「蘋果愛心糭子2004專戶」捐款編號：C0555
暖流熱線
電話：29908688
傳真：23702192
電郵：
網址：