劉德華多年來均是亞洲區最受歡迎的男歌手，今年更憑《大隻佬》連奪三個影帝榮銜。那華仔的演藝事業還有甚麼目標？他嘟着嘴笑說：「係咩？乜我係最top咩？我自己未覺得係，我相信聽日一定比今日更好，即使今日係top，如果咁就覺得夠皮，就會停咗喺度，聽日可能就會倒返轉寫，變成pot（仆），人哋叫我影帝，我上台攞獎嗰刻係，但落台之後，我下一部重係唔係呢？」
每位成功人士幾乎都有同一心態，正如華仔所說：「我份人好奇心都幾重，令自己喺不知不覺間向前行緊，食飽瞓、瞓飽食嗰個一定唔係劉德華。一年三百六十五日，當我有八十歲命先啦，即係有二萬九千幾日，我已經過咗一半，再減一半瞓覺時間，再減番食飯搭車搭飛機沖涼嘅時間，你諗吓剩番有用嘅時間有幾多？重唔乜都試吓等幾時？到臨走前諗番，乜儍儍戇戇咁就冇咗一世㗎喇？我唔得，我要每日都對得住自己。」
原來華仔也有過導演夢，他說：「呢個係每個演員都會諗過嘅問題，我只不過係拍戲時曾經有一剎那念頭：『我都可以試吓做導演。』不過到𠵱家為止我都係鍾意做戲多啲。」
即使已貴為影帝，但華仔為求拍好戲，並不計較辛苦，他講述在甘肅拍戲的情況時說：「乜都唔使講，只係沖涼已經夠攞膽，我住甘肅嗰間賓館，個花灑得三個窿識出水，啲水一係好熱，一係好凍，甘肅好大風沙，唔沖真係唔得，啲水熱到甩皮都要㗎啦。喺天竺重慘，啲水要開半個鐘先熱，沖一次涼好攰。
「我諗起套叫《洗澡》嘅戲，個婆婆拖住孫女要行一年先去到天湖度沖涼，呢次可能係佢最後一次沖涼，所以幾辛苦都要行。沖涼呢啲似乎理所當然嘅事，其實唔係必然㗎，好多人唔會睇到自己有乜，只會睇到自己冇啲乜，不停嘅物質慾念會令自己唔開心，所以人要知福惜福。」
採訪：蔡如育 攝影：林德雄
場地提供：馬可孛羅香港酒店