《蘋果日報》豪情版夾在馬經版，馬場內不時見到「豪情版」，皆因馬迷姓賴，唔少人賭錢之時，最棹忌見到貌近剝光豬嘅女人。「豪情版」咁多乜女物女性感肉感肉照，有乜辦法唔即刻丟棄「豪情版」先？惡佬明就經常在馬場有此動作，左丁山就一早丟咗，唔會帶埋「豪情版」入馬場。
睇完五月五日愛國報紙嘅全版廣告，以後唔多敢評論豪情版內嘅人物嘞。香港嘅「娛樂事業」公會、工會、協會、籌委會，甚麼代表出齊，支持人大釋法，反對普選，呼籲九月投票畀愛國愛港人士，娛樂界（包括埋麻雀耍樂界）真偉大，娛樂香港男人之餘，重肯出錢刊登全版廣告嚟娛樂香港人，令愛國人士開心到極。啲老愛國、新愛國、忽然愛國、富豪愛國等等，以後應該盡心盡意，晚晚落場，真真正正以真金白銀，回饋娛樂界，互惠互利。不過咁喎，去得多，唔好將啲歡場玉女照搬去愛國報紙，令正宗清純樸素嘅老愛國冇眼睇呀。
𠵱家曾蔭權吹風話要搞多啲功能組別，娛樂界唔會冇希望啩。有咗立法會代表之後，代表娛樂界嘅議員就可以喺《蘋果》豪情版發表政見兼質詢保安局局長同埋李一哥，問佢哋點解要咁唔體貼，破壞旺角經營環境，令從業員感受心理威脅、精神緊張，更加打擊女性就業，提高失業率；到時李局長李一哥如果唔知點答，就要求負責勞工事務嘅肥葉局長晚上十一時實地巡場，了解民情，聯絡羅康瑞大佬羅嘉瑞，要求在朗豪酒店內設場，娛樂遊客，為香港娛樂國際化作出偉大貢獻！