奧斯卡古戰爭片大熱，繼早個星期嘅《軍天勇將》之後，今個星期又嚟一隻靚佬湯扮日本武士嘅《最後武士》（3區），此片曾獲第76屆奧斯卡最佳男配角、美術指導、服裝設計及音響等4項提名，質素有一定保證。
記者：朱崇德
唔講大家可能唔知，原來《最》導演及男主角湯告魯斯，同為黑澤明武士片Fans；據大導演艾活史域表示，佢第一部睇黑氏嘅電影係《七俠四義》，當時只得17歲，而且一睇愛上猛咁翻煲，所以日本武士電影對佢日後影響好大；至於靚佬湯在後生剛入行時，更將黑氏全部作品看個透，接拍《最》除咗因為劇本好外，為自己崇拜嘅武士道致敬亦不無原因，所以觀賞此片時，不難發現《最》真係拍得誠意十足！
《最後武士》故事發生在1876年，退伍軍人尼敦艾格林上尉（湯告魯斯飾），在美國的南北戰爭中經歷種種血腥場面，身心俱疲，終日借酒澆愁。在偶然機會下，被日本政府邀請擔任槍械軍事顧問，協助天皇把東瀛武士訓練成現代化士兵。其間，艾格林與朝廷武士首領森勝元（渡邊謙飾）及叛軍武士首領（真田廣之飾）結為好友，更愛上森勝元美麗的妹妹（加籐小雪飾）；在日本武士道精神的薰陶下，艾格林重拾做人自信，不過在同一時間，訓練成師的日本皇軍火槍隊已兵臨城下，生死存亡一戰一觸即發，看着夢想的新家園將轟至變飛灰，艾格林只好披甲上陣，打一場強弱懸殊，一開始已注定失敗的戰爭。
話明史詩式古戰爭電影，震撼嘅戰爭場面當然唔少得；全片令人印象最深刻，是首場湯帶着未訓練好的新兵急赴戰場，重重的密林中、縈繞着藍藍的迷霧，隱隱的馬嘯喊殺聲中，漸漸現出叛軍的身影，拉雜成軍的皇軍槍隊，早已嚇得潰不成軍、不聽軍令、胡亂放槍，後果當然是受到武士刀以最原始的方法，斬瓜切菜般一一斬殺！難得是拍出古戰爭的真實感覺；另外，尾段的第二度會戰，亦是全劇的另一高潮，皇軍槍炮隊訓練有素，現代槍炮對戰古武士刀、箭，真係有幾分黑澤明《亂》的古風；最過癮是一眾武士巧布迷陣，打得有智有勇，結局亦感人淒厲，令人印象深刻。
《最》咁大卡士咁大製作，Disc2額外收錄嘅Making當然必睇，睇佢啲槍、炮、服飾同操練點認真，戲院都冇得睇；另一樣冇得睇就係獨家刪剪片段，原來湯剛抵日本時，有一幕在路上遇上真田廣之，兩個洋服軍警原以新頒布的「武士刀禁令」，想收佢刀，但反被真氏一刀斬頭；點樣可以拍得咁真實，刪剪片段中有講解。
建議售價：$188（DVD）$68（VCD）
區碼：3區
片長：154分鐘（126分鐘額外收錄）
發行：華納影視
