甄妮前晚在紅館舉行首場個唱，她表示請了亡友羅文與她合唱，原來是透過大銀幕播放影像對唱，更因而落淚，其後想起亡夫傅聲時，又不斷抽泣，甚為傷感。
甄妮一連三場的紅館個唱前晚揭幕，亡夫傅聲的父親張人龍偕太太捧場，女兒Melody則是座上客兼表演嘉賓。
當甄妮看到老爺和奶奶，即在台上說：「請大家用熱烈掌聲歡迎張家嘅人，見到老爺我次次都會傷心，𠵱家搞到我都亂晒。」說罷甄妮眼有淚光。
前晚場館大銀幕播出羅文所唱的《射鵰英雄傳》主題曲片段，甄妮接着對唱，營造兩人合唱的效果，然後合唱《問誰領風騷》和《世間始終你好》，甄妮說：「我請咗佢（羅文）嚟㗎，我相信佢係有嚟。我做人唔識講大話，連善意嘅大話都唔會講，所以我講嘅嘢，一定係真嘅。」提起羅文，她又忍不住拭淚。
講完羅文，甄妮又提起傅聲，她以《再度孤獨》道出對亡夫思念之情，一曲既罷，她就不斷抽泣。演唱會中途，她拿出一隻只會在三場個唱中售賣的廣東歌特別版CD，原來稍後她會推出精選碟，該碟其中一首歌是她與傅聲生前所合唱的歌曲《戀之歌》，而場館售賣的是黑色特別版CD，稍後推出的白色版則以國語歌為主。
此外，甄妮在三場個唱中均會送現場幸運兒一張去美國機票，該幸運兒還可獲邀到其家中參觀，前晚賭王何鴻燊女兒何超雄就被抽中。原來何超雄一口氣買了四百多張甄妮的CD。
個唱結束後，甄妮在慶功宴上說：「今晚因為着住對四吋高跟鞋，搞到隻腳抽筋，不過今晚個騷我已經盡力去做，又見到啲長輩嚟睇，我真係好開心，遲吓我要返美國生活，將來會唔會出嚟唱，真係唔知，可能兩年後，有興趣咪再唱囉！至於我個女會唔會入歌壇，一切等佢讀完書至算。」
採訪：李珮洳攝影：陳偉權
