電影《標殺令》上映之後，極富東洋味、二十歲未夠嘅少女栗山千明憑住佢妖中帶型嘅形象，即時榮升性格演技派。初頭我羅拉都極之睇好佢，覺得佢妖得嚟不失清純，喺日本藝能界算係稀有動物。但𠵱家《標殺令2》都上映緊，但栗山近一年嚟連一部代表作都冇，似乎佢唔係好識得把握機會。
可能栗山都知道再係咁落去唔掂，於是佢重施故技，搵攝影大師篠山紀信幫佢拍咗隻妖氣沖天嘅個人DVD《digi+KISHINDVD栗山千明》。
唔知大家記唔記得，栗山初出道時篠山都幫佢拍咗本全裸寫真集《神話少女》。當時栗山只有十三歲，本書當時引起好大話題，但我羅拉始終覺得栗山十三歲就要行呢條路太可憐。
所以當我知道栗山同篠山再合作，就有啲擔心佢會唔會又要拍啲變態feel嘅寫真，好在栗山都算錫身，DVD裏面冇進一步裸露，只係延續佢喺《標殺令》入面嘅神秘冷酷形象，最激都係踢吓腿，玩吓剪衫自殘咁啫。