自由黨主席田北俊最後會唔會走去新界東參加直選，目前重係言之過早，因為田少始終有啲心大心細，怕會遭受滑鐵盧，到時兩頭唔到岸，就喊都無謂。
加上班商家佬呢輪咁氣炎高漲，連「唔鍾意就走」咁嘅說話都講得出，又真係為田少倒米。
有高人就話，睇田少啲一舉一動，就知佢志不在直選議席，而係仍然對競逐第三屆特首存有一絲希望。
唔好以為老董嘅悲慘收場會嚇怕人，唐英年、田少、吳光正、胡應湘以至煲呔𠵱家個個都摩拳擦掌，不停熱身。田少如果真係直選成功，佢嘅認受性就明顯比對手高，以其商界背景，阿爺應該信得過佢。
不過，最唔好彩係田少舊年太勇，臨尾企咗喺7.1上街港人一邊。呢單嘢，北京肯定會記住，如果中央咁大方，民主派好多人就唔使去到羅湖橋，始終都過唔到關。所以呢，真係要祝田少好運咯！
（圖）舊年7.1大遊行，眾志成城，又難怪連田少都被遊行人士嘅熱誠所感動。
傳真︰2623-9278
電郵︰