大班封咪事件引發香港政壇大地震，而且餘震不斷，身在外國嘅大班再次發功，喺《明報周刊》個專欄爆料，澄清同煲呔絕非深交朋友，亦唔可能成為推心置腹嘅莫逆之交。佢形容煲呔只係個「永遠的忠僕」，老細有柯打，斷唔會托手踭，因此並唔係佢口中嘅轉軚朋友。
大班半生喺傳媒圈中，認識唔少傳媒中人，「真正令我感慨萬千，黯然神傷的其實是傳媒界中人。」
佢話一啲傳媒主管「竟然不知身份、忘記了自己的天職，走去跑龍套」，到深圳出席京官主持嘅所謂諮詢大會。
大班指佢哋唔敢反映香港市民爭取普選嘅聲音，只顧埋頭做筆記同講啲無關痛癢嘅問題，令佢大失所望；而最可恥嘅係有部份傳媒中人不僅為權力、金錢腐化，重走向極端，轉為變態嘅犬儒主義。不過，大班喺文章入面就無點過任何人名。
（圖）大班話好多對佢封咪嘅評論其實都係斷估，重話「汝非魚，焉知魚之慮？」
傳真︰2623-9278
電郵︰