劉德華現正身在北京拍戲，一如往年般無法陪母親共度母親節。向來與媽媽感情甚好的他，原來少年時曾因小事而整年沒有理睬母親，如今想起，華仔亦悔不當初，表示永遠無法忘記曾傷過媽媽的心，還藉此勸告大家珍惜母愛。
劉德華入行至今，甚少能在家與父母共度喜慶節日，今年母親節亦不例外，華仔現身在北京拍攝馮小剛執導的新片《天下無賊》，華仔日前接受本報訪問時說：「其實𠱁阿媽開心唔使限定一日嘅，我平時都會keep住𠱁阿媽開心，成日讚佢靚女，佢都不知幾歡喜。」
華仔因工作關係經常到處飛，但他心繫家庭，每到一個地方，例必購買當地名產或美食回家給父母，希望與他們共享好東西，華仔說：「𠱁家人唔一定要買好貴嘅嘢，有心就得，有時一個眼神，一碗湯都比一叠銀紙好。」華仔透露母親自覺年老皺紋多，不喜歡拍照，華仔有見及此，便抽空學電腦執相，將媽媽的皺紋執走，然後將相片放在母親床頭，逗她開心。
在華仔心目中，母親是世界上最偉大以及他最珍惜的女人，他說：「每個媽媽都一樣，生咗仔女之後，就完全奉獻所有畀仔女同老公，仔女嘅人生等於佢嘅人生，佢將自己投資晒喺仔女身上，我阿媽有我咁錫佢，咪就投資中咗囉，哈哈。」
不過，華仔也不是從小到大均與母親感情要好，他回憶中學時期因被母親掌摑而氣了媽媽一年。
華仔一臉難為情地說：「嗰陣我住藍田邨，𠵱家拆咗重建晒新樓好耐啦。我住嗰座離街市好遠，要行斜路上落，有日我攞住好多嘢，好重咁陪阿媽行返屋企，到樓下佢突然話唔記得買葱，叫我返轉頭買，一來一回要成半粒鐘，我話我趕住去打波，唔得，佢就一嘢兜巴星埋嚟。」
華仔表示當時在眾目睽睽下遭母親掌摑，讓他覺得甚沒面子，一氣之下整年不與母親交談半句，他說：「我阿媽真係好堅，無論我點唔睬佢，佢都當冇嘢，照樣照顧我起居飲食，有嘢都照問我，只係我唔會睬佢然後行咗去，後來點樣傾番偈我都唔記得，只係大個諗番，覺得自己好唔啱。」
華仔後悔當時幼稚的舉動，又謂這可當作現今年輕人的一個借鏡，他說：「係反面教材，好多後生仔都係咁，自以為是，唔睬阿媽，發阿媽脾氣，甚至離家出走，真係好蠢，咁做一定會後悔，我呢世都記得我曾經hurt過我媽媽。」
所謂身體髮膚受諸父母，華仔在圈中打滾多年，難免有負面新聞出現，他最不想因此令父母擔心，例如當年經營天幕時曾出現經濟危機，華仔透露有晚駕車回家後，因害怕被父母看出難過的樣子，他竟在車上呆坐數小時才返家。華仔說：「好似早前喺甘肅有個細路匿喺我床下底，或者話我拍戲整親之類，我都盡量唔想俾人知，父母會好擔心，或者我會第一時間打返屋企，等佢哋知我冇事，等佢哋唔使瞓唔着。」
