左丁山久唔久寫吓八字命理，小紅睇得耐，就以為左丁山識嘢，特登介紹風水命相師C師傅畀左丁山認識，話大家切磋切磋喎！嘩，自己識少少，唔敢扮代表，真人面前，點敢亂噏，於是專心聽C師傅講道理。C師傅自言街童出身，小學未畢業，後跟老師學習入門道理，自行苦修；現在呢，C師傅寫咗兩本書，淨係睇中文，已經叻過今日好多大學生，莫講話小學程度人士。講終生學習，自我增值，C師傅可以做人辦。
假如算命知道前程（譬如唔會發達），重有乜作為！C師傅有一番道理。佢話：「歷代統治者、皇帝最喜歡人民信佛，因為佛講前生後世、輪迴投胎，信徒容易相信做皇帝係前生注定，唔會作反。中國歷史上，由漢代黃巾之亂開始，作反派多數係道家。道士煉丹，求長生不老藥，就係認為人可勝天，唔信前世注定。諸葛亮夜觀天象，借東風，擺八陣圖，發明木牛流馬、孔明燈，顯然就係不信邪嘅道家。所以我算完之後，相信喺風水方面做番啲工夫，可以化險為夷，利用時機搞突破。」
理論就係咁，實際如何？C師傅舉咗兩個例子（有名氣大公司，不過聲明公司名字不可寫出嚟），左丁山聽到服晒。至於領導人行唔行運對我哋有乜影響？C師傅話：「英美三權分立，民主普選，領導人唔行運（如尼克遜水門事件），國家人民照樣富強。我哋中國五千年來係家天下，統治者大晒，領導人唔行運，人民都冇運行！」哦，唔怪得我哋要爭取普選！據C師傅話，董特首命理全憑父蔭（下刪一百字），佢冇運，香港亦冇運行。