薄扶林貝沙灣第三期南灣VIP業主，慘遇投資滑鐵盧，蝕本摸出單位，而買貝沙灣必賺嘅神話，亦同告幻滅。
早前以VIP身份，預留南灣單位嘅業主，近日補辦完買賣手續後，陸續放售單位，叫價淨賺一成左右。其中一座中層C室，啱啱以千二萬沽出，成為南灣首宗二手成交。
單位一六九七呎，呎價近七千一，賺十二萬。不過，扣除釐印等支出合共四十五萬，實際勁蝕三十三萬。
回顧貝沙灣之前兩期，首宗二手成交，分別淨賺三十萬及二十七萬，之後所有二手買賣無一不賺，更刷新多項紀錄，包括複式業主半年勁賺超過千五萬嘅短炒神話；分層樓價十個月內升八成二等奇迹。
輪到第三期，首宗二手成交，破嘅唔係勁賺紀錄，而係破天荒蝕本收場，都算係呢個盤嘅一個紀錄。
新地土瓜灣農圃道十八號，先賣頂層複式。繼開放Gucci做主題嘅複式示範單位後，下個禮拜開放另一個複式連天台示範單位畀傳媒參觀，成二千幾呎。
配合開盤，中原喺正樓盤對面有個展銷廳，專門用嚟推銷呢個豪宅。噚日展銷廳開幕，由於有特高二十呎樓底優勢，中原首創整咗個上下層複式展銷廳，唔知係咪特登同對面農圃道十八號複式互相呼應。
新地見到呢個似模似樣展銷廳，都幾滿意，於是將物業嘅模型送畀中原。
至於分層，新地代理執行董事周國賢話，等緊入伙紙，下個禮拜都唔會賣住。
勾地政策，雖然話由市場主導，可以有效調控未來土地供應，但政府在價錢上唔透明，就惹嚟質疑。
話說唔係幾想喺香港做地產嘅漢國，原來都心郁，想勾吓地，但聽到行家唔少失敗嘅例子，又唔知政府底線，最後決定放棄。
漢國副總經理袁燿彬話，唔理發展商成功或失敗，政府應該每次都公開勾地底價，發展商先至知道，下一次要出乜價，否則一味靠估，嘥晒發展商人力物力。
每次搵顧問去評估地價，動輒幾十萬，對大發展商嚟講，可能濕濕碎，但中小型發展商真係蚊蚊皆辛苦，好大負擔㗎。
航空公司好多時會喺電視賣廣告，宣傳公司形象，及所屬國家旅遊特色。
美國聯合航空更另闢蹊徑，喺中環國際金融中心商場，舉辦「純美逍遙集」，透過夏威夷呼拉舞、芝加哥爵士樂、人物素描、沙畫製作、旅遊資訊展覽及抽獎，推介美國夏威夷、芝加哥、三藩市與丹佛旅遊特色。另外，現場還有旅遊大使，解答旅遊問題。
國金商場不斷搞活動，增加人流，對商戶挭係有着數，第日交租又交多啲，發展商最終都受惠。
蘭西
電郵地址：