聽日就係母親節，各位唔知諗定節目未呢？重未諗？不如考慮帶媽咪入大澳靈隱寺食美味齋菜，食完飯，重可以拖住媽咪輕鬆遊大澳，行個圈，買吓蝦醬、海味先出市區。
記者：陳震霖
攝影：陳智良
模特兒：Eva、Melody、肖（StarAsia）
由東涌搭巴士過靈隱寺，車程40分鐘，巴士過咗石壁水塘，下一個站就到靈隱寺，落車後過對面馬路就有路牌指示入寺，十分方便。入寺小路雖然有少少暗斜，不過環境寧靜優美，樹蔭石橋下有游魚、蝌蚪在水嬉戲，行到身水身汗，可以帶媽咪到寺旁涼亭唞唞。
話靈隱寺係型仔廟宇一啲都無錯，樑柱方正，紅磚牆身，似西式建築物多過似中式廟宇。話說1928年，津微大法師見大澳地靈山秀，決定在此開山建寺，不過當靈隱寺就快建成，大法師突然圓寂，於是將重任交畀鼎湖山慶雲寺出家嘅靈溪和尚，落成後不斷修葺，至有𠵱家咁嘅型仔Look。
比起同區寶蓮寺，靈隱寺唔算大，不過就五臟俱全，佛堂入口先見歡迎善信嘅笑佛，拾級而上，正中有個迷你荷花池，池旁花卉盛開，加上旁邊竹林，顯得靈隱寺格外恬靜平和。
穿過大殿，上新簇簇嘅大雄寶殿，殿內侍奉三尊金佛，兩側更有巨鐘同巨鼓，信唔信佛都好，一於敲鐘打鼓，同媽咪祈福，祝媽咪一世健康、快樂。出番寶殿，倚欄遠望，好一幅環山群抱嘅天然山水畫，眼力好，重可以望到羌山㖭。
靈溪和尚出家嘅鼎湖山慶雲寺喺廣東好出名，寺內有個可以煮千人大鑊飯嘅「千人鑊」，雖則靈隱寺無「千人鑊」，不過都有唔少大鑊，日日煮出美味齋菜。平日，媽咪不分晝夜做煮飯婆，聽日母親節，係時候畀媽咪唞唞，一於夾餸餵埋畀媽咪食，雖則老土但一定受落。
咁多味齋菜，最正係炸春卷，雖然裏面無肉，不過新鮮炸起，薄薄脆皮一咬即碎，好味到唔停得口，配埋無添加例湯、白飯任裝，媽咪一定食到飽飽，捧住個肚出靈隱寺。
食飽飽，最啱做運動幫助消化，孝順仔女不如陪媽咪嚟一趟輕鬆遠足行。沿大澳道走，沿路綠樹林蔭，中途又有休憩亭，平路舒服好行，有講有笑唔使20分鐘就到大澳地標鐵索橋，由大澳街市街轉入石仔埗街，向碼頭進發，沿路上見唔少棚屋，幾大都同媽咪影多張靚相。
再過洪聖古廟，陣陣蝦醬香味不斷飄來，如果媽咪鍾意，就帶媽咪去蝦醬廠買手信。買完手信睇歷史古迹，碼頭前有小路上山坡，山坡上有一所古舊西式建築，𠵱家已經封閉，不能內進，問番原居民，先知原來係1902年興建嘅舊大澳警署。
行到呢度，相信先前嘅齋菜已經消化得七七八八，趁入黑前離開大澳，出番市區，繼續同媽咪慶祝母親節啦。
嫌入大嶼山山長水遠？其實母親節當日，港九新界重有唔少廟宇供應齋菜，不過部份寺院須1日前訂位，唔想到時等位，就早啲預訂喇。
地址：大埔錦石蓮路17號石鼓壟（26563636）
交通：大埔火車站乘22K小巴（$3.5），錦石村下車，走石蓮路登山直達。
齋菜收費：每位$45
（1日前預訂）
地址：粉嶺龍躍頭流水響龍山布格仔DD85（26741111）
交通：出粉嶺火車站，轉乘來往寺院的免費接駁小巴直達。
齋菜收費：每餸$30至$60，包粥飯（毋須預訂）
地址：荃灣老圍三叠潭
（24115111）
交通：荃灣兆和街乘81號專線小巴（$3.6），在圓玄學院門前下車，步行10分鐘直達。
齋菜收費：每位$60（毋須預訂）
地址：屯門藍地青山公路18號（24618567）
交通：葵興地鐵站乘68A巴士（$9.2）前往，藍地輕鐵站落車，步行5分鐘直達。
齋菜收費：每位$75（毋須預訂）
