早排填海風波搞到㷫烚烚，偏偏就好少聽到環境運輸及工務局局長廖秀冬出聲。冬冬接受咗最新一期中大新聞與傳播學院刊物《大學線》訪問，除咗大歎公務員「唔做唔錯」風氣不可長之外，重講咗啲對反對聲音嘅睇法。
唔好以為環保分子出身就一定反填海，冬冬話喺環保角度嚟睇，今次填海可以將淤泥挖走，變相係清理海港喎！（咁都得？）提起反填海英雄徐嘉慎，冬冬就真係火都嚟埋，佢爆料話徐嘉慎當年身為城規會成員時，明明重建議緊中環灣仔繞道要有六線行車，點知佢會突然走出嚟話反填海，講開呢件事，冬冬直頭話自己「真係好唔高興」。
睇完呢個訪問，你就會發覺冬冬真係一啲都唔好蝦，大家重記唔記得上年新界的士減價事件，啲的士佬群起反對，對出巡嘅冬冬喝倒采，搞到佢唔知幾咁尷尬。原來冬冬一直知道班「八折」司機怕減價會影響佢哋生意，出嚟反對得最大聲，冬冬於是喺試行減價期間，叫警察順便大舉掃蕩八折黨，實行一鋪打散呢班反對勢力。原來反對冬冬會落得咁嘅下場，睇怕徐嘉慎呢班反填海人士都要小心啲啦。
傳真︰2623-9278
電郵︰