𠵱家荷李活明星啲戀情關係真係好鬼causal，新西蘭名模RachelHunter同歌手前夫洛史釗活（RodStewart）離婚之後，一直不愁寂寞，今個月頭先話同佢舊男友RobbieWilliams藕斷絲連，點知轉頭又有人爆料話佢同效力美國帝王冰上曲棍球隊隊員SeanAvery拍拖，睇嚟佢全情投入趕上𠵱家嘅潮流，發展姊弟情！
我羅拉對呢位加拿大籍嘅阿Sean了解唔深，上網睇過Sean啲資料，先知佢鬼咁多fans網頁，而且聽聞佢因為型仔所以勁多女fans。雖然唔知現年35歲嘅Rachel點樣冧到呢個細佢十一年嘅口靚仔，但Sean嘅friend就爆料話：「佢哋啱啱先開始，所以唔想咁揚喎！」
唔怪之得最近有人見到Rachel去舖頭買咗張kingsize嘅大床，原來係想同阿Sean留喺睡房度加深了解，咁就唔下下出街咁揚啦！
而啱啱Rachel前日現身倫敦一個泳衣品牌周年派對，當然立即俾記者問佢新戀情嘅問題。但Rachel一於借咗聾耳陳隻耳，懶理記者嘅提問。不過喺佢隻手度，就突然多咗隻千幾萬港紙嘅手鈪，唔通係新相好Sean送畀佢嘅定情信物呢？