恒指昨日雖創跌浪新低11835，大市其實幾牛皮，裂口低開後全日在百二點內上落，下晝波幅更窄至幾十點。美國昨晚有就業數據公布，未揭盅前，大家都唔願做嘢。
恒指散場跌99點，國企指數唔見59點，不過是日最威水嘅窩輪唔係Put，而係Call。呢隻輪王係9277，乃美元兌日圓Call輪，買佢即係睇好美元而睇淡日圓。美元昨日走勢靚靚，兌日圓由109中位升上110.75，帶動隻9277躍升34%，由7仙飛上9.4仙。
按彭博資料，9277玩到6月30日，溢價2.4%，槓桿率83倍，爆炸力十足。隻輪開始步入末日階段，行使價112日圓雖有機會達到，亦有可能見到摸唔到。玩9277可以贏好多，亦可以輸晒，分分鐘幾十個巴仙上落，賭性大嘅先至啱玩。
另1件美元兌日圓Call輪9852，是日進帳21%，升幅榜排行第6。呢件行使價109日圓，屬於價內輪，現價34.5仙，溢價2.9%，槓桿率22.6倍亦算不弱，11月尾屆滿，年期長過9277好多。兩隻輪都係睇好美元兌日圓滙價，9852冇咁激，啱一般人玩。
中石油（857）再進兩個位，昨日升幅最大嘅中油輪9405，彈跳近30%。呢件槓桿率40倍好勁，但溢價6.5%，而且重係末日輪（6月21日到期），玩呢類輪要顧吓風險嗰邊。
章盛